Qostanaıda órt pen gazdyń shyǵýyn anyqtaıtyn qurylǵylar ornatylýda
QOSTANAI. QazAqparat - Qostanaıda órt pen kómirqyshqyl gazynyń shyǵýyn anyqtaý quraldary ornatylyp jatyr, dep habarlaıdy QazAqparat oblystyq TJD baspasóz qyzmetine silteme jasap.
Qazirgi ýaqytta oblystyń barlyq qalasy men aýdanynda órt qaýipsizdigin baqylaý boıynsha turǵyndarmen kezdesýler ótkizilýde. Mamandardyń aıtýynsha, jadynamalar men aqparattyq paraqshalardy taratý da órt qaýipsizdigin saqtaýǵa septigin tıgizedi.
Buǵan qosa kópbalaly, az qamtylǵan otbasylar, halyqtyń áleýmettik osal toptary turatyn turǵyn úılerde kómirqyshqyl gazy qurylǵylary ornatylýda. Oblystyq TJD bólim bastyǵy Ábil Orazovtyń aıtýynsha, qazir osyndaı 200 dabyl belgisi qoıyldy. Onyń 60-y - Qostanaı qalasynda.
Departament qyzmetkerleri júrgizgen reıd sharalary barysynda turǵyndardyń jylytý peshterine salǵyrt qaraıtyndyǵy baıqaldy. Atap aıtqanda, jeke úılerdiń ishindegi elektr symdary jańarmaǵan. Sonymen qatar, peshtiń aldynda qańyltyr qalaqshalary bolýy kerek.
«Úı-jaılardy jylytý úshin elektr jylytý quraldary paıdalanylady. Sonyń ishinde qoldan jasalǵan peshter únemi qaýipsiz emes. Symdardyń oqshaýlamasy tutanýy ábden múmkin. Sondyqtan elektr jylytqyshty paıdalaný kezinde barynsha saq bolý kerek. Arnaıy zaýyttardan shyqqan peshterdi qoldaný usynylady. Úıden shyǵar kezde olardy sóndirip otyrǵan durys»,- dep eskertedi mamandar.
