Qostanaıda ońtústikten qonys aýdarýshylarǵa baspana turǵyzyldy

Bul úıler Qazaqstannyń halqy tyǵyz ornalasqan óńirlerden teriskeıge qonys aýdaratyn otbasylarǵa jáne óńirdegi maman tapshy sala qyzmetkerlerine arnalǵan. Atalǵan máseleni sheshý úshin qarasýlyq jomart jandar bas-aıaǵy 72 mln teńge jınap, jeke turǵyn úı qurylysyna kirisken. Jańa turǵyn úı salý máselesin aýdandaǵy 10 kásiporyn basshysy óz moınyna alǵan.

Aǵymdaǵy jyldyń qarasha aıynda ońtústikten bir otbasy keldi. Bekjan Kenjebaeva Túrkistan oblysynan kóship keldi. Mamandyǵy - muǵalim. Otbasymen kelgen Bekjan endigi el ıgiline jumys isteýge kirisken. Sebebi, Qarasýda olar súıikti isimen shuǵyldaný úshin bar jaǵdaı jasalyp otyr.

«Búginde memlekettik baǵdarlamalardyń múmkindikterin barynsha durys paıdalana bilgen adamdar jetistikke jetedi. «Eki qolǵa bir kúrek» deıdi halqymyz. Memleketke qarap, aýyz ashyp otyra bermeı, erinbeı eńbektený qajet. Sonda ǵana óz degenińe jetesiń. Men Qostanaıǵa kelip, jumys tapqanyma qýanyshtymyn. Munda bizge jaqsy jaǵdaı jasalǵan», - deıdi jas maman.

Sonymen qatar, Astanadan arnaıy kelgen dárigerge de baspana kilti berildi. Janna Kenjebaeva -akýsher-gınekolog. Ol joldasy Dıas jáne qyzy Lınaramen kelgen. Akýsher-gınekolog mamany Qarasý aýdanynda 4 jyl boıy bolmaǵan. Endi mine, kásipkerlerdiń úlesimen bul másele de sheshimin tapty.

Qarasýdaǵy taǵy 2 baspana jergilikti muǵalimderge berildi. Qalǵan úıler óz ıelerin kútip tur. Jospar boıynsha memlekettik baǵdarlama aıasynda birqatar otbasy ońtústikten kóship kelýi tıis.

«Qazir biz syrt oblystardan qonys aýdarýshylar úshin arnaıy pasporttar ázirledik. Onda óńirdiń áleýmettik ınfraqurylymy: mektepter, mektepke deıingi mekemeler, densaýlyq saqtaý jáne basqa da nysandar týraly derekter kórsetilgen. Kelýshilerdi qabyldaıtyn aýdan-qalalar bos jumys oryndardyń tizimin jasady. Búginde 216 jumys berýshi 962 bos oryn usyndy. Sondaı-aq, otandastarymyzdy turǵyn úımen qamtamasyz etý máselesi sheshilip keledi. Otbasylardyń qosalqy sharýashylyqpen aınalysýyna da múmkindik bar», - dedi jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenova.

Belgili bolǵandaı, oblysqa muǵalim, mehanızator, dáriger, kólik júrgizýshileri sııaqty mamandar jetispeıdi.

Gúlnar Ábenovanyń aıtýynsha, ońtústikten keletin otbasylar joǵaryda atalǵan mamandyqtarǵa qyzyǵýshylyq tanytyp otyr.

«Bizdiń vedomstvo árbir qala, aýdandardaǵy jyljymaıtyn múlik naryǵyna saraptama júrgizdi. Máselen, aýdan ortalyqtaryndaǵy baspana 500 myń teńgeden bastap, 6 mln teńgege deıin baǵalandy. Al aýyldarda 300 myń teńge kóleminde úı tabýǵa bolady. Qalalyq jerlerde páter baǵasy 1,5-9 mln teńge aralyǵynda», - dep derek keltirdi G.Ábenova.

Jalpy, soltústik aımaqtarǵa kóshý úshin otbasynyń árbir múshesine memleket tarapynan 84 175 teńge mólsherinde qarjylaı kómek beriledi. Bir jyl boıy úıdi jalǵa alý jáne kommýnaldyq qyzmetterge aqy tóleý úshin 72 150 teńgege deıin qarjy tólenedi. Sondaı-aq, jańa jumys ornyn ashyp, qonys aýdarýshylardy turaqty jumyspen qamtyǵandarǵa árbir jumysker úshin 450 AEK kóleminde sýbsıdııa qaralǵan.