Qostanaıda onlaın nesıe rásimdeý arqyly qazaqstandyqtardy qomaqty somaǵa «sazǵa» otyrǵyzǵandar ustaldy

NUR-SULTAN. QazAqparat – Qostanaıda onlaın nesıe rásimdeý arqyly qazaqstandyqtardy 26 mln teńgege «sazǵa» otyrǵyzǵan alaıaqtar ustaldy. Bul týraly QR ІІM resmı ókili Nurdildá Oraz aıtty, dep habarlaıdy QazAqparat tilshisi.

Onyń atap ótýinshe, Qostanaı oblystyq polıtsııa departamenti kıberqylmyspen kúres bóliminiń qyzmetkerleri shaǵyn nesıe uıymdarynyń birinnen onlaın nesıe rásimdegen elordanyń eki turǵynyn ustady.

«Alaıaqtar áleýmettik jelidegi azamattardyń jeke málimetterin paıdalanyp, onlaın nesıe rásimdegen. Alaıaqtardyń is-áreketiniń saldarynan elimizdiń 12 óńirinen 210 adam zardap shekken. Zaım mólsheri 70 myńnan 300 myń teńgege deıin. Zardap shegýshilerdiń basym bóligi óz attaryna nesıe rásimdelgenin polıtsııa qyzmetkerlerinen, al qalǵandary qaryzdyń jınalyp qalǵany týraly SMS-habarlama men shaǵyn nesıe uıymdar qyzmetkerleriniń boryshty óteýdi ótingen qońyraýlarynan keıin bilgen», - dedi basqarma basshysy.

Resmı ókildiń dereginshe, alaıaqtardyń kesirinen azamattar 26 mln teńge materıaldyq zııan shegip otyr.

«Qaskúnemder aqsha qarajattaryn Qazaqstannyń túrli bankterindegi vırtýaldy kartalarǵa aýdaryp, odan deıin býkmekerlik keńselerde stavka qoıýǵa paıdalanǵan.Kúdiktileri Qostanaıdaǵy tergeý ızolıatoryna qamaldy», - dedi Nurdildá Oraz.