Qostanaıda ónerkásip ónimderi kóleminiń 90%-y 4 kásiporynǵa tıesili
QOSTANAI. QazAqparat - Qostanaıda ónerkásip ónimderin óndirý kólemi 4,2%-ǵa artqan. Bul týraly oblys ákimdiginde ótken keńeıtilgen jıynda oblys ákiminiń orynbasary Erlan Spanov málimdedi, dep habarlaıdy QazAqparat tilshisi.
Erlan Spanovtyń málimetinshe, byltyr oblys boıynsha barlyǵy 747,2 mlrd teńgeniń ónerkásip ónimderi óndirildi.
«Bul rette jalpy óndirý kólemi 4,2%-ǵa ósti. Al jan basyna shaqqandaǵy ındeks kólemi - 104,2%. Aýyl sharýashylyǵynda bul kórsetkish 3,5%-ǵa teń. 2017 jyly saýda-sattyq 5%-ǵa ósipti. Al ekonomıkanyń negizgi lokomotıvi sanalatyn turǵyn úı qurylysyna 2016 jylǵa qaraǵanda 2,8% ınvestıtsııa artyq quıylǵan. Osylaısha, turǵyn úılerdi paıdalanýǵa berý kólemi 36%-ǵa artty», - dedi ol óz baıandamasynda.
Óńirde eńbek ónimdiligi 1,2 mln teńgege ósip otyr. Taǵy bir aıta keterligi, Qostanaıda ónerkásip ónimderi kóleminiń 90%-y 4 kásiporynǵa tıesili. Atap aıtqanda, «Sokolov-Sarybaı» ken óndirý basqarmasy - 23,3%, «Varvarınskoe» - 59,9%, «Qostanaı mıneraldary» - 8,8%, «Komarovskoe taý-ken kásiporny» JShS óndiris kólemi 3,5%-ǵa ulǵaıdy. Oblys ákimi joǵary nátıjege qol jetkizgen óndiris oshaqtaryna alǵys bildirdi.
«Meni jan basyna shaqqandaǵy ındeks kóleminiń artqany qýantyp otyr. Árıne, bul joǵaryda atalǵan óndiris oshaqtarynyń arqasy. Bıylǵy jyly da osy údeden shyǵýymyz kerek. Ótken jyl jaman bolǵan joq. Sol kórsetkishti tómendetpeýge mindettimiz»,- dedi oblys ákimi.
Spanovtyń deregine súıensek, óndiris salasynda keıbir aýdandardyń kórsetkishi tómen. Máselen, Arqalyq qalasy men Altynsarın, Fedorov aýdandary tıisti mejeden shyǵa almaǵan. Óńir basshysy ótken jyldyń qorytyndysy boıynsha artta qalǵan aýdan ákimderinen jaǵdaıdy ýaqyt ozdyrmaı túzeýdi tapsyrdy.
