Qostanaıda «Óner barysy» anyqtaldy
QOSTANAI. QazAqparat - «Qostanaı» sport kesheninde mádenıet salasynyń qyzmetkerleri men ónerpazdar arasynda «Óner barysy» qaıyrymdylyq týrnıri ótti, dep habarlaıdy QazAqparat.
Ónerliler arasynda ótken jarysty «Derek» qoǵamdyq qory men oblystyq mádenıet, sport basqarmalary uıymdastyrdy.
Týrnırge 20-40 jas aralyǵyndaǵy otyzdan astam áýesqoı sportshy qatysty. Aıta keteıik, jarysqa kelgenderden túsken qarjy Jankeldın aýdanynyń ortalyǵynda turatyn segiz jasar Aqerke Jeksenbaıǵa kóp fýnktsııaly estý apparatyn satyp alýǵa jumsalmaq.
Sonymen, boz kilemge shyqqan áýesqoı palýandar túrli salmaq dárejesi boıynǵa kúsh synasty. Eki topqa bólinip beldesken palýandar arasynda 65 keliden joǵary salmaqta Talǵat Álqoja birinshi oryndy jeńip aldy. Ekinshi oryndy Qalybek Álı enshiledi. Úshinshi orynǵa Dastan Bekov jaıǵasty. Al aýyr salmaqta beldesken top arasynan Erlan Qasymov sýyrylyp alǵa shyǵyp, «Óner barysy» beldigin jeńip aldy. Erkebulan Qurmetov tıisinshe ekinshi oryndy enshilese, Baǵdat Nurmuhambetov júlde kómbesiniń úshinshi satysyna kóterildi.
«Rýhanı jańǵyrý» degenimiz eskertkish ornatý, ne bolmasa aǵash egý emes, ol - sananyń jańǵyrýy. Búgingi týrnır osyndaı maqsatta uıymdastyrylǵanyn aıta ketý kerek. Jobany qolǵa alǵan Tólendi Álqoja tárizdi azamattarǵa alǵysym sheksiz. Ulttyq óner, tól sport osyndaı janashyr adamdardyń arqasynda damıdy»,- dedi týrnırdiń saltanatty marapattaý rásiminde oblystyq mádenıet basqarmasynyń basshysy Erlan Qalmaqov.
Aıta ketken jón, «Óner barysyn» qoldaýǵa «MýzartLIVE» tobynyń ánshisi Serikbolsyn Kishkenbaev pen Ámire sııaqty jas estrada juldyzdary kelip, jankúıerler aldynda óner kórsetti. Osylaısha, olar da kishkentaı Aqerkeni qoldaýǵa shama-sharyqtarynsha óz úlesterin qosty.
