Qostanaıda óndiris ornynda jaraqat alǵan 26 jaǵdaı jasyrylǵan
ASTANA. KAZINFORM — Qostanaı oblysynyń prokýratýrasy 2024-2025 jyldary jáne 2026 jyldyń ótken kezeńinde óndiristik jaraqattanýdyń esepke alynbaǵan 26 jaǵdaıyn anyqtady. Onyń saldarynan 16 jumysshy qaza tapqan.
Qostanaı oblysynyń prokýrory Marat Seksembaevtyń tóraǵalyǵymen eńbek qaýipsizdigi men eńbekti qorǵaý salasyndaǵy zańnamanyń saqtalýyna arnalǵan Úılestirý keńesiniń otyrysy ótti.
Prokýratýra málimetinshe, óndiristik jaraqattanýdyń jalpy deńgeıi tómendegenimen, jazataıym oqıǵalardy esepke alý jáne tergep-tekserý sapasynda birqatar másele bar.
Medıtsınalyq uıymdardyń 22 habarlamasy boıynsha arnaıy tergep-tekserý júrgizilmegen. Al tergeý tártibiniń buzylýyna baılanysty 8 is boıynsha qabyldanǵan sheshim sot arqyly joıylǵan.
Budan bólek, aýyr jáne adam ólimine ákep soqqan jazataıym oqıǵalar bolǵan 9 kásiporyn tıisti profılaktıkalyq sharalarmen qamtylmaǵan.
— Osyǵan baılanysty polıtsııa men Eńbek ınspektsııasy departamentiniń aqparattyq bazalaryn yqpaldastyryp, málimetterdi turaqty túrde salystyryp otyrý usynyldy. Sondaı-aq prokýratýra azamattardyń eńbek quqyqtaryna qatysty 1,5 myńnan astam ótinishtiń tolyq qaralmaǵanyn anyqtady, — delingen habarlamada.
Anyqtalǵan barlyq zań buzýshylyq boıynsha prokýratýra prokýrorlyq den qoıý sharalaryn qabyldady.
Eske salaıyq, buǵan deıin jumys ornynda jaraqat alǵan aqtóbelik 10 mln teńge óndirip alǵanyn jazǵanbyz.
