Qostanaıda oblystyq mańyzy bar joldy sý basty
QOSTANAI. QazAqparat - Jitiqara aýdanynda sý ótkizgish qubyry joq tasjoldyń sý basqan tusyn jyrý týraly sheshim qabyldandy, dep habarlaıdy QazAqparat QR ІІM Tótenshe jaǵdaılar komıtetine silteme jasap.
«8 sáýir kúni sý ótkizgish qubyrynyń bolmaýy saldarynan oblystyq mańyzy bar «Jitiqara q. - RF Marınovka» («Jelqýar» ótkizý beketinen 300 m) tasjolynyń ústinen sý júrip ketti. «Jolaýshylar kóligi jáne avtomobıl joldary» memlekettik mekemesi basshylyǵynyń sheshimimen tasjoldyń sol tusy jyrylyp, qarǵyn sý aǵyzyldy. Kólik qozǵalysy «Aıat» ótkizý beketi arqyly júzege asyrylýda», - delingen vedomstvo taratqan habarlamada.
Búgingi málimet boıynsha, avtokólikter «Jaltyrkól» beketi arqyly júrip jatyr. Atalǵan beket Jitiqara qalasynan 75 shaqyrym jerde ornalasqan.
Al oblystyq TJD bastyǵy Talǵat Kákimovtiń sózinshe, jyl basynan beri eldi óńirdegi mekenderden 851 myń tekshe metr qar shyǵaryldy. Sondaı-aq, sý tasqynyna baılanysty 230 myń tonna ınertti materıal men 132 tonna janar-jaǵarmaı ázirlendi.
«Jergilikti atqarýshy organdarmen birigip, jolastyndaǵy sý ótkizgish qubyrlary tekserilýde. Sý tasý qaýpi bar aýmaqtardy áýeden baqylaý jumystary qolǵa alyndy. Qazirgi ýaqytta Qostanaı jáne Áýlıekól aýdandarynda qar qory saqtalǵan. Sý tasqyny qaýpiniń aldyn alý úshin Qarasý, Taran, Jangeldın aýdandarynda muz jarý jumystary júrgizildi», - dedi T.Kákimov.
Departament basshysy aıtqandaı, muz jarý jumystary osy aptanyń sońynda aıaqtalady. TJ mamandary 12 sáýirde óńirdiń ońtústik aımaqtaryn ushaqpen aralamaq.
Illıýstratsııalyq foto
