Qostanaıda naýqastyń shabýylynan zardap shekken dárigerdiń aty-jóni belgili boldy
QOSTANAI.KAZINFORM - Qostanaı oblysynyń prokýratýrasy kúdiktige qatysty protsestik májbúrleý sharalary qabyldanǵanyn habarlady. Ol QR Qylmystyq-protsestik kodeksiniń 128-baby boıynsha ustaldy.
Qazir qamaýda ustaý túrindegi bultartpaý sharasyn tańdaý máselesi sheshilip jatyr. Bul shara tek sottyń sanktsııasymen qoldanylýy múmkin.
Sondaı-aq 34 jastaǵy hırýrg-ýrolog Anton Kıstanov zardap shekken dáriger ekeni belgili boldy. Qostanaı oblystyq aýrýhanasynyń baspasóz qyzmeti onyń mekemede alty jyl jumys istegenin jáne ondaǵan adamnyń ómirin saqtap qalǵanyn aıtty.
- Otbasynyń ruqsatymen Qostanaı oblystyq aýrýhanasynyń qabyldaý bólmesinde bolǵan shabýyl saldarynan zardap shekken dárigerdiń aty-jóni belgili boldy. Qazir ol aýyr jaǵdaıda jansaqtaý bóliminde. Ol óz ómiri úshin kúresip jatyr. Úıinde ony jas jubaıy men jańa týǵan qyzy kútip otyr, - dep habarlady vedomstvodan.
Aıta keteıik, Qostanaı oblystyq aýrýhanasynyń jedel járdem bólmesinde tekserý kezinde naýqas hırýrgke shabýyl jasady. Dáriger jansaqtaý bólimine jatqyzyldy.
Oblystyq aýrýhananyń baspasóz qyzmeti kezekti operatsııany aıaqtaǵan dáriger kezekte turǵan naýqastardy qaraý úshin jedel járdem bólmesine túsken.
Kezegin kútip turǵan naýqastardyń biri janjal shyǵarǵan. Aldyn ala málimet boıynsha, úshinshi kezekte turǵan er adam dárigerge shabýyl jasap, soqqyǵa jyqqan. Sodan keıin dáriger esin joǵaltqan. Ol aýyr halde jansaqtaý bólimine jatqyzyldy.
Oqıǵa ornynda polıtsııa qyzmetkerleri keldi.