Qostanaıda nashaqor júrgizýshi eki adamnyń ólimine sebepshi boldy
ASTANA. qazAqparat - Jeksenbi kúni Qostanaı qalasynyń ortalyǵynda esirtkige eltigen kólik júrgizýshisi jolaýshylarǵa arnalǵan jolda eki adamdy qaǵyp óltirdi. Jedel járdem qyzmetiniń oqıǵa ornyna birden kelip jetkenine qaramastan, dárigerler olardyń ómirine arasha túse almady.
ІІD-niń baspasóz qyzmeti 26 jastaǵy er adamnyń oqıǵa ornynda jan tapsyrǵanyn, al 23 jastaǵy qyz qalalyq aýrýhananyń jansaqtaý bólimine jetkizilip, sonda kóz jumǵanyn habarlady.
Bul oqıǵaǵa kóp adam kýá bolǵan, dep jazady kstnews.kz.
Jas adamdar jolaýshylarǵa arnalǵan jolmen ótip bara jatqan. Sol kezde Baımaǵambetov kóshesi jaǵynan «ZAZ Chance» kóligi joǵary jyldamdyqpen kele jatqan. Kýágerlerdiń aıtýynsha, «ZAZ Chance» kóliginiń júrgizýshisi ortalyq kóshede basqa kólik júrgizýshisimen jarysqan.
Kólikti basqarǵan adam birden ustaldy. Іshki ister departamentiniń baspasóz qyzmeti júrgizýshiniń qarsylyq tanytpaǵanyn atap ótti. Jol apatyna kináli adam medıtsınalyq kýálandyrýdan ótken soń, onyń qanynda kanaboıdter, esirtki bolǵany anyqtaldy.
Atalǵan fakti boıynsha, QR QK-niń 345-baby (Jol qozǵalysy erejelerin buzý) boıynsha qylmystyq is qozǵaldy. Tergeý amaldary júrgizilip jatyr. Kúdikti ýaqytsha oqshaýlaǵyshqa qamaldy.
