Qostanaıda nan baǵasy 20 teńgege qymbattady
QOSTANAI. QazAqparat - Qostanaı oblysynda nan baǵasy kúrt qymbattady, dep habarlaıdy QazAqparat tilshisi.
Negizi, Qostanaı oblysynda nan baǵasy 2016 jyldan beri turaqty bolǵan-tyn. Sońǵy úsh jyl boıy dúken sórelerinde 60-65 teńgeden satylyp keldi. Oblystyq aýyl sharýashylyǵy basqarmasynyń bergen málimetterine súıensek, 2018 jyldyń qarasha aıynan bastap óńirdiń naýbaıhanalary un baǵasynyń ósýine baılanysty nannyń qunyn kóterý jóninde ákimdikke birneshe ret hat joldaǵan. Óıtkeni, ónimniń ózindik quny bólshek saýdadaǵy baǵadan anaǵurlym joǵary. ıAǵnı, shyqqan shyǵyndy aqtamaıdy. Onyń ústine, bul, kásiporyndy tehnıkalyq jáne tehnologııalyq jaraqtandyrýǵa, jumysshylardyń jalaqysyn ósirýge edáýir kedergi. Baǵa saıasaty óndiris oryndarynyń ekonomıkalyq kórsetkishterine de keri áserin tıgizetinin joqqa shyǵarýǵa bolmaıdy.
Endi naýbaıhanalarda bir bólkeniń quny 70-73 teńge tursa, dúkender 75-80 teńgeden satpaq.
«Baǵa bir aı buryn ózgere bastady. Óndirýshilerdiń bazynasy oryndy. Unnyń baǵasy ótken úsh aı ishinde 40 paıyzǵa deıin ósti. Bizde birinshi surypty áleýmettik nan 71 teńgege satylady. Buǵan dúkenderdiń qosatyn baǵasyn esepteńiz, sonda 75-80 teńgege alasyz degen sóz», - deıdi «Qostanaı nan zaýyty» JShS dırektory Vasılıı Ignatenko.
Zaýyt basshylyǵynyń sózine dúkenshiler de qosyldy. Máselen, oblys ortalyǵyndaǵy «Shynar» áleýmettik taýarlar dúkeninde bir bólkeniń quny - 80-85 teńge.
«Baǵanyń ósýi tikeleı un baǵasynyń ózgerýine baılanysty. Ekinshi surypty «Týretskoe» nanyn 75 teńgeden, al joǵarǵy surypty «Qostanaı» nanyn 85 teńgeden satamyz», - dep túsindirdi atalǵan dúkenniń satýshysy Inara Jaqsybaeva.
