Qostanaıda myńnan astam kásipker bıznes ashpaq
QOSTANAI. QazAqparat - Qostanaıda 1140 adam kásipkerlik kýrsy boıynsha bilim alady. Bul týraly búgin oblys ákiminiń qatysýymen ótken apparat májilisinde belgili boldy, dep habarlaıdy QazAqparat.
Oblys ákimdigi aýyl sharýashylyǵy jáne jer qatynastary basqarmasynyń basshysy Jansultan Táýkenov aıtqandaı, osy jyly «Bastaý Bıznes» jobasyna qatysýshylardyń qatary artqan. Qazirge deıin kásipkerler palatasy 1140 adamdy kásipkerlik negizderine oqytpaq. Sondaı-aq, jergilikti bıýdjetten «QazAgrogarant» AQ fılıalyna shaǵyn nesıe berý úshin 252,8 mln teńge bólindi.
«Bıyl oblystyń shaǵyn jáne orta bıznes sýbektilerin shaǵyn nesıeleý quny ósip, 2,6 mlrd teńgege jetti. Qarjy Aýyl sharýashylyǵyn qarjylaı qoldaý qory jáne Agrarlyq nesıe korporatsııasy ınstıtýttary arasynda bólindi. Bólingen qarajat boıynsha aýyl sharýashylyǵy mınıstrligi tıisti ındıkatıvterdi belgiledi. Jyl sońyna deıin 396 shaǵyn nesıe berilip, 79 startap joba iske asyrylady. Buǵan jas kásipkerler de qatysa alady. Bul shaǵyn nesıe alýshylardyń tizimin keńeıtýge múmkindik beredi», - deıdi Jansultan Táýkenov.
Al Arhımed Muhambetov jas kásipkerlerdi jan-jaqty qoldaýdy tapsyrdy. Olar qazirden bastap tıimdi memlekettik baǵdarlamalarǵa qatysýy tıis. Óńir basshysy qatysýshylarǵa kredıt berý óńirlerdiń mamandaný kartasyna sáıkes júzege asyrylatynyn aıtty.
«Qarjy ınstıtýttary búginde 1 mlrd teńge somasyna 254 ótinimdi qabyldap, 204 kásipkerge qarjy bóldi. Kásipkerlerdi qarjylandyrý jumystary Amangeldi, Fedorov jáne Qarasý aýdandarynda belsendi iske asýda. Bul baǵytta Meńdiqara, Sarykól, Altynsarın jáne Jangeldın aýdandarynyń kórsetkishteri tómen», - dep túsindirdi J.Táýkenov.
