Qostanaıda muz saraıy men shańǵy bazasy ashylady
ASTANA. QazAqparat - Qostanaı oblysynda zamanaýı muz aıdyny saraıy jáne shańǵy bazasy ashylady. Bul týraly «Habar 24» habarlaıdy.
Bul maqsatqa shamamen 5 mıllıard teńge baǵyttalmaq. Qarajattyń 90% ınvestorlar esebinen qarastyrylady. Qazir oblysta 2446 sport nysany bar. Bular túrli keshender, oıyn alańdary men hokkeı korttary. Halyqtyń 30% buqaralyq sportpen qamtylǵan. Al qysqy sport túrleri kenjelep tur. Qostanaı jáne Rýdnyı qalalarynda ǵana muz aıdyny saraılary bar. Shańǵy sporty, konkımen syrǵanaý jáne short-trekten bar joǵy 12 adam ulttyq quramaǵa múshe.
«Qala, aýdandarda muz aıdyny saraılaryn kóptep salýymyz qajet. Qys mezgilinde sportshylar esh alańdamastan shuǵyldaný úshin jabyq keshender bolsa tipti jaqsy. Sebebi, bizdiń óńir barlyq jas erekshelikteri boıynsha Qazaqstan quramasyna sportshylar daıarlaıdy», - dedi short-trekten oblystyń aǵa bapkeri Nıkolaı Fedorenko.
Degenmen, 2019 jyly jaǵdaı kúrt ózgermek. Óńirde sońǵy úlgidegi eki iri sport nysany boı kóteredi. Respýblıkalyq, halyqaralyq deńgeıdegi jarystardy qabyldaý múmkindigi bolady. Eń bastysy - turǵyndardyń qysqy sport túrlerine qoljetimdiligi artady.
«Memlekettik-jekemenshik áriptestik aıasynda 2000 oryndyqqa arnalǵan muz aıdyny saraıy salynady. Onyń quny 4,5 mıllıard teńge. Nysanda short-trek, mánerlep syrǵanaý sııaqty sport túrlerin damytamyz. Al jergilikti bıýdjetten 400 mıllıon shańǵy bazasyn turǵyzýǵa jumsalady», - dedi oblystyq deneshynyqtyrý jáne sport basqarmasynyń bólim basshysy Sergeı Bogachenko.
Sala mamandary jańa muz aıdyny saraıynyń ashylýymen oblysta ekinshi hokkeı komandasynyń paıda bolýyn joqqa shyǵarmaıdy. Bul da halyqtyń qysqy sport túrlerine degen qyzyǵýshylyǵyn oıatary anyq.
