Qostanaıda Murat Áýezovtiń eki kitabynyń tusaýy kesildi
Olardyń arasynda mádenıettanýshy-ǵalym, memleket jáne qoǵam qaıratkeri Murat Áýezov, qazaqtyń kórnekti aqyny, Qazaqstan Respýblıkasynyń Memlekettik syılyǵynyń laýreaty, "Juldyz" jýrnalynyń bas redaktory Ulyqbek Esdáýlet, Qazaqstan Jýrnalıstıka akademııasynyń prezıdenti, professor Saǵymbaı Qozybaev, Qazaqstannyń eńbek sińirgen qyzmetkeri, "Mysl" jýrnalynyń bas redaktory Aıaǵan Sandybaı bar.
Zııaly topty oblys ákimi Arhımed Muhambetov qabyldady. Aımaq basshysy oblysta rýhanı jańǵyrý baǵytynda júrgizilip jatqan keshendi is-sharalar barysyn áńgimelep, qonaqtarmen oı bólisti. Munan soń qonaqtar oblystyq L.Tolstoı atyndaǵy kitaphananyń 80 jyldyq mereıtoıyna arnalǵan halyqaralyq ǵylymı-praktıkalyq konferentsııaǵa qatysty. 
Sharanyń negizgi bóligi Qostanaı pedagogıkalyq ınstıtýtynda jalǵasty. Munda Murat Áýezovtiń «Dilim» jáne «Vremen svıazýıýşaıa nıt» atty kitaptarynyń tusaýkeser rásimi ótip, kópshiliktiń nazaryna usynyldy. Memleket jáne qoǵam qaıratkeriniń júrip ótken ómir jolynan syr shertetin kitapta táýelsizdiktiń qadir-qasıeti de sóz bolady.
«Bul kitap eki bólimnen turady. Áýelgisi orys tilinde shyqty. «Vremen svıazýıýşaıa nıt» dep atalady. «Dilim» atty taraýdy asqan súıispenshilikpen jazdym. «Dilim» - ıran tilinen shyqqan sóz. «Adamnyń jan dúnıesi men bolmysy» degendi bildiredi. Ákem alashordashylarmen de aralas-quralas boldy. Meni óz qolymen 1-synypqa, qazaq mektebine eritip aparǵany da áli kúnge esimde. Ol kezde qazaq mektepteri sanaýly edi. Ákeden alǵan tárbıemdi, bilgen-túıgenimdi osy kitaptyń ishine syıǵyzýǵa tyrystym», - dedi Murat Áýezov.
