Qostanaıda Mirjaqyp Dýlatulynyń mereıtoıyna arnalǵan at marafony bastaldy
QOSTANAI. KAZINFORM — Qostanaı oblysynyń Torǵaı aýylynda uly aqyn ári «Alash» qozǵalysynyń qaıratkeri Mirjaqyp Dýlatulynyń týǵanyna 140 jyl tolýyna oraı merekelik is-sharalar ótti, dep habarlaıdy «AMANAT» partııasynyń baspasóz qyzmeti.
Oǵan Májilis Spıkeri, «AMANAT» partııasynyń Tóraǵasy Erlan Qoshanov, Qostanaı oblysynyń ákimi Qumar Aqsaqalov, Parlament depýtattary jáne qalyń jurtshylyq qatysty.
Mereke aıasyndaǵy mańyzdy oqıǵalardyń biri — «Uly dala joryǵy» Respýblıkalyq at marafony. Osylaısha, 5 kúnde elimizdegi 13 óńirdiń, Qazaqstan halqy Assambleıasynyń, sondaı-aq Qyrǵyzstan jáne Reseı memleketteriniń namysyn qorǵaıtyn komandalardaǵy 90 shabandoz Tobyl-Torǵaı dalasyn dúbirletip, 500 shaqyrym qashyqtyqty júrip ótedi.
Májilis Spıkeri Erlan Qoshanov quttyqtaý sózinde «Uly dala joryǵynyń» ótkizilýi — ulttyq sport túrleri jandanyp kele jatqanynyń jarqyn dáleli ekenin málimdedi. Ol halqymyzǵa kóptegen kórnekti mádenı jáne qoǵam qaıratkerlerin tartý etken qasıetti Torǵaı jerinde at marafonyn ótkizýdiń sımvoldyq mánin aıryqsha atap ótti. Olardyń arasynda Mirjaqyp Dýlatuly erekshe oryn alady.
— Memleket basshysy Qasym-Jomart Toqaev ulttyq sport túrlerin damytýǵa kóp kóńil bóletini belgili. El Prezıdentiniń qoldaýymen byltyr Dúnıejúzilik kóshpendiler oıyndary oıdaǵydaı ótti. Al qazir Mirjaqyp Dýlatulynyń 140 jyldyǵyna oraı aýqymdy at jarysy men aqynnyń shyǵarmashylyǵyna nazar aýdarýǵa múmkindik beretin ózge de kóptegen is-shara ótkizilip jatyr. Qazaq halqynyń uly perzenti de atqumar, saıatshy bolǵany, jıren qasqa Alakóz atyn janyndaı qasterlegeni málim. Shabandozdardy tarıhı oryndardy basyp ótetin tartysqa toly uzaq jol kútip tur. Barsha qatysýshyǵa sáttilik tileımin, — dedi Erlan Qoshanov.
Májilis Spıkeri ulttyq sport túrlerin qoldaý baǵytynda memleket tarapynan aýqymdy jumys atqarylyp jatqanyn atap ótti. Elordada Ulttyq sport ýnıversıtetiniń irgetasy qalandy, Aqtóbede jylqy sharýashylyǵy ınstıtýty ashyldy. Byltyr el Prezıdenti otandyq jylqylardyń tuqymdaryn saqtaý jáne ósimin molaıtý máseleleri boıynsha arnaıy zańǵa qol qoıdy. Soǵan sáıkes, jylqylardy, sonyń ishinde ataqty Qostanaı tuqymyn suryptaý boıynsha júıeli jumys bastaldy. Igi iske «AMANAT» partııasy da óz úlesin qosyp keledi. Máselen, osymen altynshy márte ótkizilip otyrǵan jáne qoǵamnyń úlken qyzyǵýshylyǵyn oıatqan «Uly dala joryǵy» syndy jobalarǵa qoldaý kórsetip jatyr.
Bıyl alǵash ret at marafonyna Qazaqstan halqy Assambleıasynyń «Birlik» komandasy qatysady. Óz ónerin shabandozdar osy jyly atap ótiletin QHA-nyń 30 jyldyǵyna arnady.
Osy kúni Torǵaı topyraǵy elimizdiń úzdik aqyndary bas qosqan respýblıkalyq aqyndar aıtysynyń alyp sahnasyna aınaldy. Aqyndar saıysy naǵyz óner merekesine aınalyp, kóziqaraqty kórermen Mirjaqyp Dýlatulynyń mol murasyn jańa qyrynan tanydy.
— Aıtys — tek sóz óneri ǵana emes, tarlan tarıhymyz ben rýhanı qazynamyzdyń aınasy. Barlyq qýǵyn-súrgin men synaqtarǵa qaramastan, halyq Mirjaqyp Dýlatulynyń esimin júreginde saqtap qaldy. Búgin biz onyń máńgilik murasyna qaıta júginip, Torǵaı topyraǵy elimizdiń rýhanı ortalyǵy bolǵanyn jáne solaı bolyp qala beretinin kórip otyrmyz. Joldaýda Memleket basshysy Qasym-Jomart Toqaev osy óńirdiń damýyna erekshe nazar aýdarýdy tapsyrdy. Torǵaı ólkesiniń bolashaǵy zor ekenine jáne kóp uzamaı ol halqymyzdyń rýhanı-mádenı jańǵyrýynda qaıtadan ózindik ornyn alaryna senimdimin, — dedi Erlan Qoshanov.
Aıta keteıik, mereıtoılyq is-sharalar aıasynda Qostanaıda Mirjaqyp Dýlatulynyń eskertkishi ashyldy, al Torǵaıda aqyn ári oıshyldyń murasyna arnalǵan ǵylymı konferentsııa ótti. Depýtattar men qoǵam belsendileri Bıdaıyq aýylyndaǵy aqynnyń shaǵyn otanynda ornalasqan murajaıǵa bardy.
Budan buryn «AMANAT»-ta Prezıdent Joldaýyn júzege asyrý boıynsha keńeıtilgen otyrys ótkenin jazǵanbyz.