Qostanaıda Mirjaqyp Dýlatulynyń 140 jyldyǵyna oraı eskertkish ashyldy
QOSTANAI. KAZINFORM - Memleket basshysynyń tapsyrmasymen Májilis tóraǵasy Erlan Qoshanov Mirjaqyp Dýlatulynyń 140 jyldyǵyna arnalǵan eskertkishtiń ashylýyna qatysty.
Kórnekti qaıratker, Alashtyń aıaýly perzentiniń eńseli eskertkishi Qostanaı qalasynda boı kóterdi.
Saltanatty is-shara barysynda Májilis spıkeri Prezıdent Qasym-Jomart Toqaevtyń quttyqtaý hatyn oqyp berdi.
– Tól tarıhymyzda azattyq úshin aıanbaı kúresken, ulttyń rýhyn kóterýge ólsheýsiz úles qosqan tuǵyrly tulǵalar az emes. Sonyń biri ári biregeıi – Mirjaqyp Dýlatuly. Ol qazaqtyń asqaq armany men muń-muqtajyn tereń túsinip, el múddesine qaltqysyz qyzmet etti. Jurttyń sana-sezimin jańǵyrtý jolynda eńbek etip, jasampaz rýhtyń jarshysy boldy. Adamzatqa ortaq qundylyqtardy keńinen dáriptep, jastardy óner-bilimge úndedi. Mirjaqyp Dýlatuly ádebıetimizdi jańa deńgeıge kóterýge zor eńbek sińirdi. Halqymyzdyń birtýar perzentiniń qaıratkerlik qasıeti men azamattyq ustanymdary óskeleń urpaqqa árdaıym úlgi-ónege bolary sózsiz, – delingen Prezıdent quttyqtaýynda.
Saltanatty is-sharaǵa Qostanaı oblysynyń ákimi Qumar Aqsaqalov, Májilis depýtattary, zııaly qaýym ókilderi men jergilikti jurtshylyq qatysty. Qazaqstannyń Halyq jazýshysy Tólen Ábdik pen M.Dýlatulynyń jıeni Erlan Satybaldıev sóz sóılep, Alash qaıratkeriniń rýhyna taǵzym etti.
Óz kezeginde Qostanaı oblysynyń ákimi Qumar Aqsaqalov aıtýly is-sharanyń mańyzdylyǵyna toqtaldy.
– Ult rýhanııatynyń uly tulǵasy, Alash qozǵalysynyń qaıratkeri, aqyn, jazýshy, aǵartýshy Mirjaqyp Dýlatuly – azattyq jolynda bar ǵumyryn arnaǵan asyl tulǵa. Onyń murasy – jas urpaq úshin máńgilik ónege, rýhanı shamshyraq.
Jańa eskertkish – óńirimizdiń rýhanı kelbetin baıytyp, óskeleń urpaqty eljandylyqqa tárbıeleıtin taǵylymdy orynǵa aınalady dep úmittenemin, - dedi oblys ákimi.
Jalpy, Mirjaqyp Dýlatulynyń 140 jyldyǵy oblys, respýblıka deńgeıinde keń aýqymda atap ótilip jatyr. Búgin Torǵaı aýylynda halyqaralyq at marafony «Uly dala joryǵy» alaman báıgesi bastalady. Tulparlar Tobyl-Torǵaı dalasyn dúbirletip, 500 shaqyrymdyq marafonda baq synaıdy.
Budan bólek, mirjaqyptanýǵa arnalǵan ǵylymı konferentsııa men dúldúl aqyndardyń basyn qosqan respýblıkalyq aıtys ótedi.
Májilis spıkeri bul aıtýly is-sharalar memlekettiń, ultynyń Alash arysyna bergen baǵasy, kórsetken qurmeti ekenin atap ótti.
– Biz qazir de tarıhı, taǵdyrly shaqta ómir súrip jatyrmyz. Alash arystary ańsaǵan Táýelsizdikke qolymyz jetti. Eńseli el boldyq. Sońǵy jyldary Prezıdenttiń júıeli, keshendi reformalary halqymyzdyń jan jaqty qoldaýyn taýyp otyr. Eldegi oń ózgerister qoǵamnyń bolashaqqa degen senimin nyǵaıtyp keledi. Bizdiń búgingi maqsatymyz – Ádiletti, Qýatty, Taza jáne Qaýipsiz Qazaqstandy qurý. Aınalyp kelgende, keshegi Alash arystarynyń da, búgingi bizdiń de arman-ańsarymyz osy, – dedi Erlan Qoshanov.
Osyǵan deıin Qyrǵyzstanda Abaı Qunanbaıulynyń qurmetine kóshe ataýy berilip, eskertkish ornatylǵany týraly jazǵan edik.