Qostanaıda motor jóndeıtin áıel turady
QOSTANAI. KAZINFORM – Kóliktiń motory, qoraby nemese elektronıkasyn jóndeýshi dese, kóz aldymyzǵa orta jastaǵy er adam elesteıtini sózsiz. Biraq bul mamandyqty meńgergen áıel adamdar da kezdesedi. Temir tulpardyń zildeı bólshekteri isten shyqsa, op-ońaı jóndeıtin sheberdiń biri Qostanaı oblysynda turady.
Álııa Qýanbaeva Qamysty aýdanyndaǵy Altynsarın seriktestiginiń sheberhanasynda elektr qozǵaltqyshtaryn jóndeýmen aınalysady. Ol erlermen qatar júrip, tehnıkanyń tilin jetik meńgerip alǵan. Bir kúnde bir ózi 2–3 qosalqy bólshektiń aqaýyn taýyp, ár symyn shash órgendeı etip sheberlikpen oraıdy.
Sheber alǵashynda sharýashylyqta aspaz bolyp jumys istegen. Keıin áriptesteriniń isine qyzyǵyp, temir men symnyń tilin túsinip, osy salaǵa aýysqan. Sodan beri 18 jyl boıy erlermen ıyq tirestire eńbek etip júr.
– Motorlardy jóndeımin. Aldymen maıdan tazartyp alamyn. Odan keıin ne sebepti isten shyqqanyn qaraımyn. Symdaryn sheship, qaıta oraımyn. Júk kólikteriniń qosalqy bólshekterin ǵana emes, kez kelgen motordy jóndeı alamyn. Mysaly, sharýashylyqtyń jylý beretin qazandyǵynda aqaý bolýy múmkin. Úgitkish qurylǵylardyń da motorlaryn da isteýdi meńgerip alǵanmyn, – deıdi Á. Qýanbaeva.
Sharýashylyqta astyq oratyn kombaınnan bastap, tyrma, traktor, júk kólikterine deıin san alýan tehnıka bar. Qaısybiriniń generatory isten shyqsa, Álııanyń qolyna jóndeýge tapsyrylady. Al ol tolyq tekserip, isten shyqqan bólshegin qalpyna keltiredi.
– Jumysym syrt kózge aýyr kóringenimen, men úshin eshqandaı qıyndyǵy joq. Bul iste bastysy – kúsh. Negizi, erlerdiń isteıtin jumysy ǵoı. Biraq ózime jaıly, bári unaıdy, úırenip alǵanmyn. Kez kelgen tehnıkanyń aqaýyn tabamyn. Jumystan shyqqan soń motor men generatorlardy umytyp, úı tirligine kirisemin, – deıdi motorshy.
Álııa – úı men túzdiń jumysyn qatar dóńgeletip júrgen jandardyń biri. Keıipkerimizdiń úsh uly bar. Kelin túsirip, áje atanǵan. Joldasy da osy sharýashylyqta jumys isteıdi.
Qazaqstanda kásipker áıelder sany qansha ekenin osy materıaldan oqyńyz.
Qazaqstannyń qaı óńirinde áıelder kóp turatynyn myna materıaldan bilesiz.