Qostanaıda merdigerler qalyń jaýǵan qardy kúrep úlgermeı jatyr

QOSTANAI. KAZINFORM - Bıylǵy qarly qys qar shyǵarý problemasyn qıyndatyp jiberdi. Jaıaý júrginshiler joly, trotýarlar qar qursaýynda qaldy. 

Qostanaılyqtar birneshe ret áleýmettik jelilerde osy jaǵdaıdy aıtyp, shaǵymdandy.

Qardyń ýaqtyly áketilmeýine merdiger uıymdar jumysynyń durys uıymdastyrylmaýy sebep bolǵan. 

— Qalanyń merdiger uıymdary qar shyǵaryp úlgermedi. Shaǵym jasalyp, oryndaýshylarǵa jiberildi. Endi másele sheshildi dep aıtýǵa bolady. Merdigerler materıaldyq-tehnıkalyq bazany nyǵaıtty. Trotýardaǵy qar belsendi kúrelip jatyr, — dep atap ótti qalalyq TKSh bóliminiń kógaldandyrý sektorynyń meńgerýshisi Altynbek Qaıratuly.

Oblys ortalyǵynda qar jınaıtyn 4 polıgon jumys isteıdi.

Olar — Drýjba kentiniń, burynǵy hımzavodtyń mańy, Tobyl qalasyndaǵy «Gorızont» JShS polıgony, sondaı-aq Tartaban aýdanynyń aýmaǵy.

— Bizde qar polıgony jetkilikti. Bólingen aýmaqta tehnıka jumys istep jatyr. Osy jyldyń basynan beri barlyǵy 265 myń tekshe metr qar shyǵaryldy. Aýmaqty keńeıtý nemese jańa polıgon ashýǵa keletin bolsaq, qazirgi ýaqytta ondaı problema joq, bizde bar polıgonǵa búkil qar syıady, — dep túıindedi sektor basshysy.