Qostanaıda memleket qarjysyn jymqyrǵan departament basshysy sottaldy

  QOSTANAI. QazAqparat - Memleket qarjysyn jymqyrǵan Qostanaı oblysy ádilet departamentiniń personalmen jumys jáne ishki qaýipsizdik bóliminiń basshysy Bolat Qaıypov 3,5 jylǵa sottaldy, dep habarlaıdy QazAqparat.

Іs materıaldaryna súıensek, Bolat Qaıypov 2017 jyldyń qańtarynan bastap 2018 jylǵy qańtarǵa deıin 3,2 mln teńge memleket qarjysyn jymqyrǵan. Ol jymysqy is-áreketterin óziniń qyzmetin paıdalanyp júzege asyrdy. Naqtyraq aıtqanda, ol qolastyndaǵy qyzmetkerleriniń is-saparǵa tólenetin qarjysy men syıaqylaryn ózine alyp otyrǵan.

«B.Qaıypov qylmystyq is-áreketteri arqyly ádilet departamentine 1 mln 240 myń teńge, sondaı-aq departamenttiń 14 qyzmetkerine 2 mln 357 myń teńge kóleminde shyǵyn keltirgen. Sottalýshynyń kinási dáleldendi. Kámelet jasyna tolmaǵan balalary bar, bul jazany jeńildetetin faktor bolyp esepteledi. Jazasyn ústemeleıtin sebepter joq. Qaıypovty qylmystyq is jasaǵany úshin kináli dep taýyp, 4 jyl, 4 aıǵa bas bostandyǵynan aıyrý týraly úkim taǵaıyndaýyńyzdy suraımyn. Jeke múlkin tárkilep, memlekettik qyzmetten ómir boıyna shettetý suralady. Jazasyn qaýipsizdigi ortasha túzetý mekemesinde ótesin», - delingen prokýror Ermek Músápirovtiń aıyptaý aktisinde.

Sot úkimi boıynsha B.Qaıypov kináli dep tanylyp, 3,5 jylǵa bas bostandyǵynan aıyryldy. Múlki tárkilenip, qaýipsizdigi ortasha túzetý mekemesinde jazasyn óteıdi.

Buǵan qosa eks-sheneýnik ómir boıyna memqyzmetten shettetildi.