Qostanaıda mektep aýmaǵynda ósken jabaıy sora orylyp, órteldi

QOSTANAI. QazAqparat – Qostanaıda polıtseıler eriktilermen birge shańǵy bazasynyń aýmaǵynda bes gektar jabaıy sora órtedi, dep habarlaıdy QazAqparat tilshisi.

Ósimdik № 3 balalar-jasóspirimder orta mektebiniń aýmaǵynda ósken. Mektep qyzmetkerleri polıtsııadan jabaıy kendirdi joıýǵa kómek suraǵan.

«Polıtsııa tárkilengen esirtkilerdi órteý aktsııasyn komıssııa men qoǵamdastyqtyń aldynda turaqty ótkizip keledi. Maqsaty – qaıta aınalymǵa shyǵarýǵa jol bermeý», - dedi oblystyq PD qyzmetkeri Aıgúl Erádilova.

Ósimdikti órteý «Qarasora-2022» jedel-profılaktıkalyq is-sharasy aıasynda ótti, onyń mindetteriniń biri – quramynda esirtki bar ósimdikterdiń jabaıy jáne zańsyz ósiriletin daqyldaryn anyqtaý jáne joıý.

Jyl basynan beri óńirde 207 esirtki qylmysy men quqyq buzýshylyq, onyń ishinde quramynda esirtki bar, ósirýge tyıym salynǵan ósimdikterdi zańsyz ósirýdiń alty faktisi anyqtaldy.

Polıtsııa departamentiniń esirtki qylmysyna qarsy kúres basqarmasy qyzmetkerleriniń aıtýynsha, munda qarasora adam boıymen birdeı bolǵan.