Qostanaıda medıtsınalyq mekemelerdi ońtaılandyrý arqyly 75 mln teńge únemdeledi

QOSTANAI. QazAqparat - Densaýlyq saqtaý salasynyń ınfraqurylymyn damytý boıynsha Biryńǵaı perspektıvalyq jospardy iske asyrý aıasynda Qostanaı oblysynda medıtsınalyq uıymdardy ońtaılandyrý, biriktirýdiń arqasynda olardyń sany 40-tan 23-ke deıin qysqarady, dep habarlaıdy «QazAqparat» HAA tilshisi.

Oblystaǵy ońtaılandyrý protsesi týraly Qostanaı oblysy densaýlyq saqtaý basqarmasynyń basshysy Vıacheslav Dýdnık baıandap berdi. Jyl sońyna deıin 40 statsıonarlyq uıymnyń 23-i qalady dep josparlanyp otyr.

«Arqalyq aýrýhanasyna perzenthana qosylady. Rýdnyı qalalyq aýrýhanasyna balalar aýrýhanasy men perınataldyq ortalyq qosyldy. Qostanaı, Rýdnyı, Arqalyq qalalarynyń jedel medıtsınalyq járdem stansalary qosylyp, oblystyq jedel járdem stansasy qurylǵan. Oblystyq aýrýhanany qaıta uıymdastyrý máselesine kelsek, ol perınataldyq ortalyq jáne teri-venerologııalyq dıspanserdi qosý jolymen iske asyrylyp otyr», - dedi V.Dýdnık.

Vedomstvoda sendirgendeı, medıtsınalyq uıymdardy biriktirýdiń arqasynda únemdelgen bıýdjettik qarajat somasy 75 mln jýyq teńgeni quraıdy.