Qostanaıda medıtsınalyq mekeme tegin emdeýden bas tartty
QOSTANAI. QazAqparat - Qostanaıdaǵy «Aksım Plıýs» JShS medıtsınalyq mekemesi azamattarǵa memlekettik tapsyrys aıasynda medıtsınalyq qyzmet kórsetpeıdi. Bul týraly óńirlik kommýnıkatsııalar qyzmetinde ótken brıfıngte oblystyq áleýmettik medıtsınalyq saqtandyrý qorynyń dırektory Sáýle Aımuhambetova aıtyp berdi, dep habarlaıdy QazAqparat.
2019 jyldan bastap oblys ortalyǵyndaǵy «Aksım Plıýs» JShS mekemesi azamattarǵa memlekettik tapsyrys aıasynda medıtsınalyq qyzmet kórsetpeıdi. Narıman kóshesi boıynda ornalasqan bul emhana keler jyldan bastap tek aqyly qyzmet kórsetý júıesine kóshkeli otyr.
«Qazirgi ýaqytta bes myń qostanaılyq osy emhanada tirkeýde tur. Bizge jibergen hatta olar tek aqyly negizde jumys isteıtinin aıtqan. Ne sebepti ekeni belgisiz, bul - zańdy tulǵanyń sheshimi. Olar qor tapsyrysyna qatysqysy kelmeıdi. Sondyqtan «Aksım Plıýs» JShS-de tirkeýde turǵan barlyq naýqas 15 qarashaǵa deıin basqa medıtsınalyq mekemelerge tirkelýi qajet, biraq medıtsınalyq uıym olarǵa 2018 jyldyń sońyna deıin tegin qyzmet ete beredi», - deıdi S.Aımuhambetova.
Sáýle Aımuhambetova aıtqandaı, árkim ózi tańdaǵan emhanaǵa tirkelýge quqyly. Máselen, qalamyzdaǵy №№1,2,3,4 emhanalar men «Ýromed» JShS, «Stomed grýpp» JShS medıtsınalyq mekemeleri men temirjol aýrýhanasyna tirkelýge bolady.
«Tirkelýdi úsh tásilmen jasaýǵa bolady. Áýeli, ózińiz qalaǵan emhana arqyly, sondaı-aq, egov.kz aqparattyq portaly jáne jergilikti HQKO arqyly jeke málimetter jazylady. Emhana arqyly tirkelý úshin jeke kýálik pen bas dárigerdiń atyna jazylǵan ótinish kerek. Halyqqa qyzmet kórsetý ortalyqtary arqyly tirkelý úshin Connection Points bóliminiń qyzmetin paıdalana alasyz. Halyqty tirkeýmen aınalysatyn emhanalardyń tizimi Áleýmettik medıtsınalyq saqtandyrý qorynyń fms.kz saıtyndaǵy «Klınıka tańdaý» bóliminde ornalasqan», - deıdi maman.
Qostanaı oblysynda barlyǵy 31 uıym alǵashqy medıtsınalyq-sanıtarlyq kómek kórsetýmen aınalysady. Jıynda belgili bolǵandaı, bıyl Arqalyq qalasynda «Qazaqstan» jańa jeke medıtsınalyq ortalyǵy ashylmaq.
