Qostanaıda medıtsına qyzmetkeri 60 myń teńgege júrgizýshi kýáligin satyp kelgen
Oblys ákiminiń orynbasary Ǵaýez Nurmuhambetovtyń tóraǵalyǵymen ótken selektorlyq otyrysta jol qozǵalysy qaýipsizdigi men densaýlyq saqtaý salasynda kórsetiletin memlekettik qyzmet sapasyn arttyrý máselesi talqylandy. Byltyr oblys turǵyndaryna 3 mıllıonnan astam memlekettik qyzmet kórsetilgen. Onyń teń jartysynan astamy densaýlyq saqtaý salasyna tıesili. Muny sala basshysy Vıacheslav Dýdnık aıtty.
«Qostanaı qalasyndaǵy №4 emhanaǵa kelýshilerge qolaıly jaǵdaı jasalǵan. Emhananyń foıesi jańartylyp, arnaıy front-keńse iske qosyldy. Nátıjesinde dáriger qabyldaýyna elektrondy túrde kezekke jazylý júıesi jolǵa qoıyldy», - deıdi ol.
Al «Qostanaı oblysynyń azamattyq alıansy» QQ tóraıymy Dınara Ótebaeva «Qostanaı - adaldyq alańy» jobasynyń aıasynda densaýlyq saqtaý salasyna júrgizilgen qoǵamdyq baqylaý nátıjeleri máz emes deıdi.
«Baqylaý sharalarynyń nátıjesinde 20 shaqty zań buzý deregi anyqtalǵan. Máselen, Taran aýdanynyń ortalyq aýrýhanasynda júrgizýshi kýáligi satylyp keldi. Aýrýhananyń qabyldaý bólimine qońyraý shalyp, medıtsınalyq anyqtama suraǵan «qupııa satyp alýshyǵa» aýrýhana qyzmetkeri 60 myń teńgege júrgizýshi kýáligin satyp alýdy usynǵan», - dedi D.Ótebaeva.
Jıynǵa qatysýshylar aýdıotaspaǵa jazylyp alynǵan «qupııa satyp alýshy» men dárigerdiń telefon suqbatyn tyńdady.
Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Salaýat Múksimovtiń sózinshe, qazir mundaı jaǵdaılar az kezdespeıdi. Sondyqtan azamattarǵa júrgizýshi qujatyn berip, avtokólik nómirlerin tirkeıtin mamandandyrylǵan qyzmet kórsetý ortalyqtary aýdan ortalyqtarynda da ashylýy tıis.
«Kólik salasyndaǵy jemqorlyq túbegeıli joıylý úshin tirkeý-emtıhan qabyldaý bólimsheleri jabylyp, ol atqaryp kelgen mindet memlekettik korporatsııaǵa júktelýi kerek. Qazirshe Áýlıekól, Fedorov aýdandarynyń turǵyndary ǵana Memlekettik korporatsııa arqyly júrgizýshi kýáligi men kólik nómirin alyp, avtokóligin tirkeýge qoıa alady. Bul másele Jitiqara, Qarabalyq, Uzynkól aýdandary men Lısakov, Arqalyq qalalarynda sheshilmeı tur», - dep túsindirdi departament basshysy.
Sonymen qatar «Qostanaı - adaldyq alańynyń» «Qupııa satyp alýshylary» áleýmettik jeli arqyly usynylatyn qyzmet túrlerine de saraptama jasaǵan. Nátıjesinde «OLH», «VKontakte», «Instagramm» jelilerinde daıyn kýrstyq jáne dıplom jumystaryn satatyn 19 tulǵa anyqtalǵan.
Oblys ákiminiń orynbasary Ǵaýez Nurmuhambetov bul baǵytta áli de qyrýar sharýa atqarý qajettigin aıta kelip, aýdan ákimderi men múddeli sala basshylaryna tirkeý-emtıhan qabyldaý bólimshelerin «Azamattarǵa arnalǵan úkimet» memlekettik korporatsııasynyń quzyryna ótkizý sharasyn jedeldetýdi tapsyrdy.