Qostanaıda mas júrgizýshiler 15 táýlikke qamalyp, 8 jylǵa kýálikterinen aıyryldy
QOSTANAI. QazAqparat - Mas kúıinde rýlge otyrǵan qostanaılyqtar birneshe jylǵa kólik júrgizý quqyǵynan aıyryldy, dep habarlaıdy QazAqparat oblystyq Polıtsııa departamentiniń baspasóz qyzmetine silteme jasap.
Qostanaılyq polıtsııa qyzmetkerleri «Qaýipsiz jol» jedel-aldyn alý is-sharasy aıasynda bir kún ishinde avtokólikti mas kúıinde júrgizgen úsh júrgizýshini ustady.
«Qostanaı qalasynyń Altynsarın kóshesinde 34 jastaǵy er adamnyń basqarýyndaǵy «Nissan Teana» avtokóligi toqtatyldy. Júrgizýshiden alkogoldiń ıisi sezildi. Medıtsınalyq kýálandyrý alkogolden masań bolýdyń jeńil dárejesin kórsetti. Qostanaı qalasynyń mamandandyrylǵan ákimshilik soty júrgizýshini 7 jyl merzimge kólik quralyn basqarý quqyǵynan aıyrdy. Sondaı-aq 15 táýlik merzimge ákimshilik qamaýǵa alý týraly sheshim shyǵardy», - dedi polıtsııanyń baspasóz hatshysy Irına Bejenar.
Buǵan qosa, eki kólik júrgizýshisi alkogol ónimine tekserýden ótýden bas tartqan.
Sot júrgizýshilerdi 8 jylǵa kólik júrgizý quqyǵynan aıyrý týraly sheshim qabyldady jáne olar 15 táýlikke qamaýǵa alyndy.
