Qostanaıda mas júrgizýshi kóligimen temirjolda turyp qaldy
QOSTANAI. QazAqparat – Qostanaı qalasynda kólik júrgizýshisi temirjol ústine shyǵyp ketip, turyp qalǵan, dep habarlaıdy QazAqparat.
Oblystyq Polıtsııa departamentiniń baspasóz hatshysy Irına Bejenardiń aıtýynsha, oqıǵa búgin tańǵy saǵat 06:00 shamasynda bolǵan.
«102» kezekshi pýltine polıtsııanyń jelilik bóliminiń qyzmetkeri qońyraý shalyp, temirjol boıyna «Folksvagen» kóliginiń shyǵyp ketkenin habarlady. Oqıǵa ornyna tártip saqshylarynyń toby jumyldyryldy», - dedi Irına Bejenar agenttik tilshisine.
Polıtseıler kólikte 31 jastaǵy er adamnyń jalǵyz bolǵanyn anyqtady. Oǵan QR Ákimshilik quqyqbuzýshylyq týraly kodeks boıynsha hattama toltyrylyp, aıyppul jazyldy. Tekserý nátıjelerinen soń kólik júrgizýshisiniń alkogol ishkeni belgili boldy.
