Qostanaıda marshrýttyq avtobýstar qozǵalysyna shekteý engizildi
QOSTANAI. QazAqparat – Oblys ákimi Arhımed Muhambetov oblys shekarasyndaǵy blok-beketterdi aralady, dep habarlaıdy QazAqparat oblys ákiminiń baspasóz qyzmetine silteme jasap.
Oblys ákimi elimizde tótenshe jaǵdaıdyń engizilýine jáne koronavırýstyq pandemııaǵa baılanysty Qostanaı oblysyndaǵy sanıtarlyq-epıdemıologııalyq sharalarmen tanysty. Osy maqsatta Qarasý aýdanyndaǵy №11 (Surǵan) blok-beketine bardy.
Bul blok-beket Qostanaı-Áýlıekól-Surǵan tas jolynyń 240 shaqyrymynda Janysaı aýylynyń janynda ornalasqan.
Oblys ákimi qyzmetkerlermen kezdesip, jumys jáne demalys jaǵdaılaryn qarady.
Arhımed Muhambetov sanıtarlyq-epıdemıologııalyq sharalardy qamtamasyz etý boıynsha jaýapty memlekettik organdardyń daıyndyǵyna oń baǵasyn berdi.
№11 blok-bekette 2 aýysym boıynsha 12 saǵat kezekshilik júrgiziledi. Bir aýysym jumysyna 6 polıtsııa qyzmetkeri, onyń ishinde 3 SOBR qyzmetkeri, sondaı-aq 2 medıtsına qyzmetkeri qatysady.
Polıtsııa qyzmetkerleri oblys aýmaǵyna kiretin kólikterdi tirkeýmen aınalysady, al dárigerler kirgen adamdardyń temperatýrasyn ólsheıdi.
Esterińizge sala keteıik, Qostanaı oblysynda 10 blok-beket óz jumysyn 31 naýryzynda saǵat 22-00-den bastady.
Bul nysandarda oblys aýmaǵyna kiretin jáne shyǵatyn avtokólik pen azamattarǵa baqylaý júrgiziledi.
Júkterdi jetkizetin nemese tranzıtpen ótetin aımaqtaǵy júk kólikteriniń qozǵalysy Polıtsııa departamentiniń patrýldik polıtsııasymen baqylanady, olar kirý jáne shyǵý ýaqytyn belgileıdi. Eldi mekender arasynda marshrýttyq avtobýstar men shaǵyn avtobýstar qozǵalysyna shekteýler engizildi. Alaıda oblys ishinde júrip-turýǵa barlyq jeńil kólik túrlerine ruqsat etiledi.
