Qostanaıda makaron shyǵaratyn zaýyt salynbaq
QOSTANAI. QazAqparat - Italııanyń Rım qalasynda ótken aýyl sharýashylyǵy óndirisin damytý týraly jıynǵa Qostanaı oblysy ákiminiń orynbasary Meıirjan Myrzalıev qatysty, dep habarlaıdy QazAqparat oblys ákimdigi baspasóz qyzmetine silteme jasap.
Qazaqstan men Italııa arasyndaǵy ónerkásiptik jáne ekonomıkalyq áriptestikti damytý boıynsha ótken bıznes-forýmǵa qostanaılyq «Tobyl» áleýmettik-kásipkerlik korporatsııasynyń mamandary da qatysty.Aýyl sharýashylyǵy salasyndaǵy tájirıbe almasý, AÓK baǵytyndaǵy ınvestıtsııalyq jobalardy pysyqtaý maqsatyndaǵy jumys sapary barysynda delegattar sol eldegi birqatar agrarlyq sektor mekemelerin aralady.
«Biz Rımde aýyl sharýashylyǵy taýarlaryn óńdeýmen aınalysatyn birneshe nysanmen tanystyq. Sonyń ishinde 60 jyldyq tájirıbesi bar PAVAN kompanııasyn erekshe atap ótýge bolady. Biz bıdaıdyń qatty surybynan jasalatyn makaron ónimderin óndiretin ortaq kásiporyn qurǵymyz keledi. Óıtkeni ol aımaǵymyz úshin asa suranysqa ıe», - deıdi Qostanaı oblysy ákiminiń orynbasary Meıirjan Myrzalıev.
Jalpy, «Kazakh Invest» UK, «QazAgro» UBH jáne Qostanaı oblysy ákimdigi 9 myńnan astam mekemeni biriktirip otyrǵan Mılan men Lombardııa saýda-ónerkásiptik palatalarymen kelissózder júrgizdi.
Qostanaılyqtar Andalini makaron ónimderi tsehyna baryp, zaýyt prezıdenti Massımo Andalınımen júzdesti. Kezdesý barysynda eki tarap «Makaron ónimderin óndiretin zaýyt qurylysy» jobasyn iske asyrý boıynsha ózara kelisimge qol qoıdy. Endi jaqynda Qostanaıda makaron shyǵaratyn zaýyttyń qurylysy bastalmaq.
