Qostanaıda qyzyl kólikpen qyzdy urlap ketkeni týraly habar tarady
QOSTANAI. QazAqparat - Dúısenbi kúni Zatobolsk №3 mektep-gımnazııasynyń mańynda belgisiz bireý qyzdyń alqymynan alyp, ony belgisiz baǵytqa alyp ketken. Osyndaı mazmundaǵy habarlama áleýmettik jelide taraǵan, dep habarlaıdy QazAqparat.
Onda atalyp ótilgendeı, oqıǵaǵa baılanysty izdeý sharalary bastaldy.
«01.10.2018 jyly Zatobolsk kentindegi №3 mektep-gımnazııasynyń mańynda belgisiz bireý búldirshinniń (qyzdyń) alqymynan alyp, ony belgisiz baǵytqa qaraı alyp ketkeni týraly habar túsken. Qyzyl tústi kólik kúdikke ilikti», - delingen Qostanaı AІІB bastyǵynyń mindetin atqarýshy M.B.Jaılaýbekov qol qoıǵan baǵyttamada.
Taratylǵan habarlamada atalyp ótilgendeı, osy týraly qandaı da bir aqparat biletinderden 102 nómiri boıynsha polıtsııaǵa baılanysýlaryn suraıdy.
Qostanaı ІІD baspasóz qyzmeti bul faktige qatysty ázirge túsinik bergen joq.
