Qostanaıda Qyzyl kitapqa engen qusty atqandar ustaldy
QOSTANAI. QazAqparat - Qostanaı oblystyq polıtsııa departamenti tabıǵatty qorǵaý organdary qyzmetkerlerimen birigip, «Brakoner» jedel-profılaktıkalyq is-sharasyn ótkizdi, dep habarlaıdy QazAqparat tilshisi.
Іs-shara barysynda ekologııalyq qylmys pen quqyqbuzýshylyqtardy anyqtaýǵa, onyń jolyn kesýge baǵyttalǵan 56 utqyr top qurylyp, óńirdi aralady. Úsh kún ishinde oblystaǵy 553 ańshy men balyqshy tekserildi.
«Qamysty aýdanynyń Svobodnoe aýylynan 20 shaqyrym jerde 3 kúdikti ustaldy. Olar Halyqaralyq tabıǵatty qorǵaý odaǵy men Qazaqstannyń Qyzyl kitabyna engizilgen shıqyldaq qazdy atqan. Kúdiktilerdiń barlyǵy Tobyl aýylynyń turǵyndary ekeni anyqtaldy. Olardan zańsyz aınalymda júrgen 2 qarý tárkilendi», - delingen habarlamada.
Shıqyldaq qazdy atqandar memleketke 721 myń teńge zalal keltirdi. Atalǵan fakt boıynsha QR QK 337-baby, 4-tarmaǵy boıynsha (Zańsyz ań aýlaý) sotqa deıingi tergeý sharalary júrgizilip jatyr.
Aıta keteıik, Qazaqstannyń bıologııalyq alýantúrlilikti saqtaý qaýymdastyǵy shıqyldaq qazdy «Jyl qusy-2013» dep jarııalady.
