Qostanaıda qyzmettik kólikti jeke maqsatqa paıdalanǵan ákim jazalandy
QOSTANAI. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamenti Qostanaı qalasy men Qostanaı aýdanynda qyzmettik kólikter boıynsha tekserý jumystaryn júrgizdi, dep habarlaıdy QazAqparat tilshisi.
2017 jyldyń 15 qyrkúıeginde jumystan tys ýaqytta (saǵat 08:00 shamasynda) Zatobol kentindegi N.Naýshabaev atyndaǵy orta mekteptiń janyna 807 AR 10 memlekettik nómirli «Vaz 21214» avtokóligi toqtaıdy. Kólikten áıel men balasy túsip, mektepke kiredi. Sálden soń áıel jalǵyz shyǵyp, kólik júrgizýshisimen birge belgisiz aımaqqa júrip ketken.
19 qyrkúıektegi qaıta tekserý barysynda dál osy jaǵdaı qaıtalanady. Keıinnen bul kóliktiń Qostanaı aýdanyna qarasty Glazýnov aýyldyq okrýginiń balansynda turǵany, onymen aýyl ákimi B.E.Nurǵazınniń júretini anyqtaldy.
Osy fakt boıynsha B.Nurǵazınge qatysty tártiptik is qozǵalyp, departament qyzmetkerleri qyzmettik tekserý júrgizdi.
Tártiptik is 2017 jyldyń 28 qyrkúıeginde departamenttiń Ádep jónindegi keńesiniń kóshpeli otyrysy aıasynda qaraldy.
Memlekettik qyzmetshiniń is-áreketterinen Etıkalyq kodeks normalaryn saqtamaǵany belgili boldy. Óz kezeginde aýyl ákimi taǵylǵan aıypty tolyǵymen moıyndady. Joǵaryda atalǵan kúnderi oblys ortalyǵynan 30 shaqyrym qashyqtyqta ornalasqan Glazýnov aýylynan N.Naýshabaev atyndaǵy mektepke jubaıy men balasyn ákelip tastaǵanyn aıtty.
Ádep jónindegi keńestiń sheshimimen, ózine senip tapsyrylǵan memlekettik menshikti jeke maqsatqa paıdalanǵan ákimge eskertý berildi.
