Qostanaıda qyzmet babynda kóz jumǵan polıtseılerge eskertkish qoıyldy
QOSTANAI. QazAqparat – Qostanaı oblysynyń Altynsarın aýdanynda qyzmettik boryshyn atqarý kezinde qaza bolǵan qyzmetkerlerge eskertkish ashyldy, dep habarlaıdy QazAqparat.
Ashylý rásimine ishki ister organdarynyń ardagerleri, polıtsııanyń jas kómekshileri, polıtsııa bóliminiń jeke quramy qatysty. Altynsarın aýdany ákiminiń orynbasary Erjan Samıdosov eskertkishtiń jas polıtseıler úshin mańyzdy ekenin atap ótti. Endi munda polıtsııa merekesi kúni jas qyzmetkerlerdiń ant qabyldaýy sııaqty eleýli sharalar ótetin bolady.
«Táýelsizdik alǵan jyldary Qostanaı oblysynyń 42 polıtseıi qyzmet babynda qaza tapty. Olardyń 11-i asa qaýipti qylmyskerlerdi ustaý kezinde kóz jumdy. Búgingi is-shara – beıbit ýaqytta azamattardyń tynyshtyǵy men qaýipsizdigi úshin óz ómirin bergen adamdarǵa qurmet kórsetý. Olar árqashan jas urpaqqa úlgi bolady», - deıdi Qostanaı oblysy PD bastyǵynyń orynbasary Ardaq Yntyqbaev.
Sondaı-aq, Qostanaı oblysy polıtsııa departamenti ardagerler keńesiniń tóraǵasy Amangeldi Ómirbaev ta tártip saqshylarynyń róli týraly sóz etti. Jınalǵandar eskertkishke gúl shoqtaryn qoıyp, qaza tapqandardy eske aldy.
