Qostanaıda qylmystyq top 1,6 mlrd teńgeden astam bıýdjet qarajatyn jymqyrǵan

QOSTANAI. QazAqparat – Qostanaı oblysynda qylmystyq toptyń 2022 jyldan qazirgi ýaqytqa deıin et satý boıynsha oıdan shyǵarylǵan mámileler arqyly bıýdjet qarajatyn jymqyrǵan áreketine qatysty tergeý jalǵasyp jatyr, dep habarlady QazAqparat.

Qarjylyq monıtorıng agenttiginiń málimetinshe, urlyq somasy 1,6 mlrd teńgeden asady. Eske salaıyq, uıymdasqan topty iri et óńdeý kásipornynyń dırektory basqarǵan. Onyń quramyna qaramaǵyndaǵylar, sharýa qojalyqtarynyń basshylary, mal dárigerleri men laýazymdy tulǵalar kirdi.

Qylmystyq shema sharýa qojalyqtarynyń qaıta óńdeý zaýytyna joq ónimderdi, sondaı-aq qylmystyq top músheleri arasynda bólingen sýbsıdııalar alǵan artyq salmaǵy bar ónimderdi jetkizýden turdy. Qazir uıymdasqan qylmystyq top músheleriniń qylmystyq áreketterine qatysy bar 50-den astam sharýa qojalyǵy anyqtaldy. Búginde alaıaqtyq, uıymdasqan top qurý jáne basqarý faktileri boıynsha on jeti qylmystyq is tirkeldi.

Top músheleriniń bank uıashyqtarynda jáne esepshottarynda shetel jáne ulttyq valıýtadaǵy jalpy somasy 3 mıllıonnan astam AQSh dollary bar ekeni anyqtaldy. Aldyn ala tergeý barysynda qojalyq basshylary kinásin moıyndap, 62 mln teńgeden astam qarjyny óz erkimen memleket kirisine qaıtarǵan.

Tergeý barysynda uıymdasqan qylmystyq toptyń 5 belsendi múshesi qamaýǵa alyndy. Sotqa deıingi tergeý jalǵasyp jatyr. QR QPK 201-babyna sáıkes ózge de málimetter jarııa etilmeıdi.

QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.