Qostanaıda kúıip qalǵan 4 jasar bala jansaqtaý bóliminde jatyr
QOSTANAI. QazAqparat - Oqıǵa ótken jeksenbide Fedorovsk aýdanynda bolǵan. Otpen jáne benzınmen oınaǵan 4 jasar Artem Logovchınnyń aıaǵyn qatty kúıik shalǵan. Bala qazir Qostanaı oblystyq aýrýhanasynyń jansaqtaý bóliminde jatyr, dep habarlaıdy QazAqparat tilshisi.
12 tamyzda kishkentaı Artemniń anasy ony joldyń ar jaǵynda kórshi turatyn balalarmen oınaýǵa jiberip, ózi úıde omyraýdaǵy balasymen qalǵan.
«Kórshi 10 jasar ul bala men 4 jastaǵy qyz úıde jalǵyz qalǵan. Úlkeni «Senderge fokýs kórseteıin be? dep, janyp jatqan otqa shólmektegi benzındi quıyp jiberedi. Sol kezde bizdiń ulymyz dál janynda turǵan. Ottyń jalyny balamnyń trıkosyna tıip ketip, órtene bastaǵan. Ol úıge júgirgenshe trıko túgeldeı órtenip, shalbarynyń jartysy ǵana qalǵan. Kórshimiz Artemdi kórip, kıiminen qalǵanyn sheship alǵan», - dep eske alady Marına Logovchına.
Balalardyń tentektiginiń saldarynan 4 jasar Artemdi úshinshi dárejeli kúıik shaldy. Bala birden Fedorovskiniń ortalyq aýdandyq aýrýhanasyna jetkizilgen. Degenmen ol jerde balaǵa durys kómek kórsetilmegendikten, anasy ony Qostanaıǵa alyp etken.
«Qazir oblystyq balalar aýrýhanasynyń jansaqtaý bóliminde aýyr halde jatyr. Alda áli teri aýystyrý operatsııasy kútip tur. Dárigerler ázirge eshteńe aıtpaıdy. Balama qan jınap jatyrmyz», - dedi Marına.
Balanyń anasy ázirge Qostanaıda júr. Alda áli aýyr otalar kútip turǵandyqtan, balasyna moraldyq turǵydan kómek kórsetýge tyrysýda.
