Qostanaıda kúıik shalyp, aýrýhanaǵa túsken bala kóz jumdy
QOSTANAI. QazAqparat - Ústimizdegi jyldyń 29 tamyzy kúni denesin kúıik shalyp, aýrýhanaǵa jetkizilgen 8 jasar bala kóz jumdy, dep habarlaıdy QazAqparat tilshisi.
Dárigerler Sergeı Pavlovskııdi eki aı emdep, ajaldan arashalap qala almady.
«Bilikti dárigerler jumyldyryldy. Biraq, dene kúıigi saldarynan ishki aǵzalary qabiletten aıyrylǵan. Muny ǵylymda dekompensatsııa dep ataıdy. Ol birneshe otaǵa shydaı almady. Keshe saǵat 19:30 shamasynda júregi soǵýyn toqtatty», - dedi oblystyq balalar aýrýhanasy bas dárigeri mindetin atqarýshy Igor Belobrjıtskıı.
Al «Bıýro dobryh del» qoǵamdyq qorynyń jetekshisi Irına Meltser Sergeı Pavlovskııdi jerleý rásimine qarjy kerektigin aıtyp, jomart jandardan kómek suraıdy.
«Men balanyń anasy Lıýbov Pavlovskaıamen habarlastym. Ol qaıyrymdy jandardan materıaldyq qoldaý kútedi. Kómek qolyn sozamyn deýshiler bizdiń áleýmettik jelidegi paraqshalarymyzǵa jazylyp, baılanysqa shyǵýyna bolady», - dedi Irına Meltser.
