Qostanaıda kúıeýinen zábir kórgen áıelder panalaıtyn ortalyq ashyldy
QOSTANAI. QazAqparat - Qostanaı qalasynda turmystyq zorlyq-zombylyqtan zardap shekken áıelderge kómek kórsetetin alǵashqy ortalyq ashyldy, dep habarlaıdy QazAqparat oblystyq ІІD baspasóz qyzmetine silteme jasap.
Aıta ketý kerek, Ortalyq qyzmetkeri Nına Kosıýk atalǵan mekemeniń naqty qaıda ornalasqanyn jarııalamady. Onyń aıtýynsha, áıelder quqyq qorǵaý organdarynyń joldamasymen qabyldanady. Osyǵan deıin otbasynda zábir kórgenderge tek jatyn oryn boıynsha kómek berilip kelgen. Endi qıyn sátke ushyraǵan názik jandylarǵa keshendi járdem usynylatyn bolady. Ortalyqta áıelderge psıhologııalyq, quqyqtyq jáne medıtsınalyq qyzmetter kórsetilmek. Mekemege túsken sátten bastap ár áıelmen áleýmettik qyzmetker áńgimelesedi. Zorlyq-zombylyqtyń sebepteri anyqtalyp, odan arǵy is-áreketter jospary ázirlenedi.
ІІD aqparatyna súıensek, jyl basynan beri polıtsııaǵa turmystyq zorlyqtan zardap shekken 1400-den astam áıel júgingen.
«Qazaqstanda otbasylyq janjaldyń kesirinen jylyna 600-deı áıel men qyzdyń ómiri qıylady. Bizdiń tarapymyzdan turmystyq zombylyqtyń aldyn alý boıynsha únemi profılaktıkalyq sharalar uıymdastyrylyp turady. Máselen, ótken eki aıdyń ishinde otbasylyq janjaldarǵa jol bergen 747 tulǵa ákimshilik jaýapkershilikke tartyldy», - deıdi oblystyq ІІD áıelderdi zorlyq-zombylyqtan qorǵaý bóliminiń aǵa ınspektory Gaýhar Haırýllına.
Haırýllınanyń aıtýynsha, otbasylyq jaǵdaılardan zardap shekken áıelder kóbine ýchaskelik polıtsııa ınspektorlaryna júginedi. Osyǵan oraı polıtseıler Qostanaıda áıelder men balalarǵa arnalǵan Daǵdarys ortalyǵy jumys isteıtinin eske salady. Mamandar áıelderdi qalalyq jumyspen qamtý ortalyǵy arqyly turaqty eńbekke ornalastyrýǵa kómektesedi. Mamandyǵy joqtar oqytý kýrstaryna jiberiledi.
