Qostanaıda qutqarýshylar aýyr jaǵdaıdaǵy úsh naýqasty shuǵyl aýrýhanaǵa jetkizdi

QOSTANAI. QazAqparat - Qostanaılyq qutqarýshylar bir táýlikte 17 adamdy qutqaryp, 3 naýqasty evakýatsııalady, dep habarlaıdy QazAqparat.

25 naýryzda shuǵyl medıtsınalyq kómek kórsetý úshin Ashýtasty aýylynyń turǵyndaryn Arqalyq qalasynyń aýrýhanasyna tasymaldaýǵa qutqarýshylardyń kómegi qajet boldy.

1977 jyly týǵan er adamnyń aıaǵy synǵan, al 1974 jyly týǵan jigitti ıt tistep alǵan.

Sonymen qatar, jol boıynda qar qursaýynda qalyp qoıǵan 3 jeńil avtokólikten 11 adam, onyń ishinde 2 bala qutqaryldy. SKB-600 jol talǵamaıtyn kóligimen 30 shaqyrym joldy eńserip, saǵat 18:35-te qyzmetkerler azamattardy Arqalyqqa aman-esen jetkizdi.

26 naýryzǵa qaraǵan túni Áýlıekól aýdanynda JQB qyzmetkerleri 1998 jyly týǵan júkti áıeldi Turǵymbaev aýylynan evakýatsııalap, ony Áýlıekól aýylyndaǵy aýrýhanaǵa jetkizý úshin jergilikti atqarýshy organdarǵa tapsyrdy.

Ol úshin qutqarýshylarǵa 100 shaqyrymǵa jýyq júrip ótý múmkindigi joǵary «TREKOL» tehnıkasymen júrýge týra keldi.

Ótken túnde Alýa aýylynyń janyndaǵy Arqalyqtan 80 shaqyrym jerdegi aýdandyq mańyzy bar avtojolda taǵy bir qutqarý operatsııasyn JQB qyzmetkerleri júrgizdi.

Qutqarýshylar kólikte qalǵan adamdarǵa kómekke keldi. Olar turǵan jeńil kólik qar qursaýynda qaldy.

Onyń ishinde 6 adam 2 balany UQK-600-ge otyrǵyzyp, saǵat 01:35-te Arqalyq qalasyna medıtsınalyq kómekke alyp keldi.