Qostanaıda qutqarýshylar úıindi astynan taǵy bir adamdy tapty, qalǵan ekeýin izdep jatyr

Qostanaıda qıraǵan úıdiń ornynda qutqarý jumysy jalǵasyp jatyr. Qazir úıindi astynda shamamen úsh adam bar, dep habarlaıdy Kazinform tilshisi oqıǵa ornynan.

Dál osy sátte qutqarýshylar sol úsheýdiń bireýin syrtqa shyǵarý úshin jantalasyp jatyr.

— KAMAZ ortalyǵy jalǵa alǵan tehnıkalyq qyzmet kórsetý stansasynyń aýmaǵynda gaz-aýa qospasynyń jarylýynan ǵımarat qulady. 10-ǵa jýyq adam jaryqshaqtan zardap shegip, dáriger kómegine júgindi, — dedi Qostanaı oblysy tótenshe jaǵdaılar departamentiniń basshysy Qasym Qaırat.

Opyrylǵan aýmaq — 280 sharshy metr. 

Qostanaı oblysynyń bas qutqarýshysy Qasym Qaırat tabylǵan adamdy tiri shyǵarý yqtımaldyǵy óte tómen ekenin naqtylady.

Óıtkeni Qostanaıda qytymyr aıaz kúshine minip tur.

— Taqtalar gıdravlıkalyq jabdyqtyń kómegimen kóteriledi. Jumysqa aıaz ben kúshti jel kedergi jasap otyr, — dedi spıker.

Taǵy eki adamdy izdeý jumysy jalǵasyp jatyr. Olardyń shamamen qaı tusta ekenin jábirlenýshilerdiń biri jáne ıisshil ıt te kórsetip bergen.  

Bul jumysqa 200 adam men 39 tehnıka jumyldyrylǵan. 

Eske sala ketsek, búgin Qostanaıda 7 adam qıraǵan úıdiń astynda qalyp qoıǵany habarlanǵan edi.

Keıin úsheýi úıindi astynan shyǵaryldy.

Jedel kómek qyzmeti 4 adam — Qostanaı oblystyq aýrýhanasyna, 7 adam — Qostanaı qalalyq aýrýhanasyna jetkizilgenin málim etti.

Keıinnen TJD basshylyǵy áli de úsh adam qulaǵan úıdiń astynda ekenin málimdedi.