Qostanaıda qus fabrıkasy qaryzyn jumyrtqamen ótemek
QOSTANAI. QazAqparat - «Sever-Ptıtsa» aktsıonerlik qoǵamy eki jyldan beri «Qostanaı-Sý» mekemesine sýdyń qaryzyn ótemeı kelgen. Endi qus fabrıkasy kommýnaldyq tólem boryshynyń biraz bóligin jumyrtqamen jabady, dep habarlaıdy «QazAqparat» tilshisi.
«Qostanaı Sý» kásiporny basshylyǵy jergilikti qus fabrıkasynyń qaryzyn osy ádispen qaıyrýǵa kelisip otyr. Jalpy «Sever-Ptıtsanyń» tek qana sýǵa 8 mıllıon teńgeden astam bereshegi bar.
«Aktsıonerlik qoǵam 2015 jyldan bastap sý qunyn tólemedi. Boryshker fabrıkany bir mámilege shaqyryp, daýdy sotqa deıin sheshpek boldyq. Bul týraly qalalyq turǵyn-úı kommýnaldyq sharýashylyq bólimin qulaǵdar ettik. Osylaısha, ábden qordalanǵan qaryzdyń biraz bóligin jumyrtqalaı alýǵa kelisip otyrmyz», - deıdi «Qostanaı sý» MQM dırektorynyń orynbasary Arman Júnisov.
Al «Sever-Ptıtsa» AQ dırektory qaryzdy jýyq arada qaıtarýǵa talpynys jasap jatqanyn aıtady.
«Biz kún saıyn qaryzdy aqshalaı ótep jatyrmyz. Ekinshi taraptyń basshysymen kelisilgendeı, jańa jylǵa deıin aqshany jumyrtqalaı óteımiz. Ózara kelisim de jasaldy. Olarǵa barynsha tómen baǵamen ótkizemiz. Bir jaǵynan, «Qostanaı sý» kásiporynynyń qyzmetkerleri úshin osylaı tıimdirek bolýy tıis», - dedi qus fabrıkasynyń dırektory Konstantın Mıakotın.
Alaıda, memlekettik sot oryndaýshylar qaryz ótelgenshe «Sever-Ptıtsa» aktsıonerlik qoǵamyna tıesili tehnıkalardy tárkileıdi.
«Qus fabrıkasy «Qostanaı sýdyń» aldyndaǵy 50 myń teńge ǵana qaryzyn japty. Qalǵan bereshekti tólegen joq. Endi barlyǵy zań boıynsha, óndirý qujatyna sáıkes jasalady. Jaqynda, «Kamaz» avtokóligi aýktsıon arqyly satylatyn bolady. Qaryz tolyq ótelgenshe ózge de múlik tárkilenedi. Jyljıtyn, jyljymaıtyn múlikterdiń barlyǵyna tyıym salynyp, saýda-sattyqqa shyǵarylady. Bizdiń maqsatymyz - kommýnaldyq kásiporyn paıdasyna 8 mıllıon teńgeni tez arada óndirý», - dep jaýap berdi Qostanaı oblystyq ádilet departamenti basshysynyń orynbasary Ashat Júnisov.
Aıtpaqshy, «Sever-Ptıtsa» fabrıkasynyń «Qostanaı sýdan» basqa, ózge de mekemelerge bereshegi bar. Al jarty jyl buryn qyzmetkerlerdiń aılyǵy prokýratýranyń aralasýymen áreń tólengen edi.
