Qostanaıda qurylysshylar qaýymdastyǵy quryldy
QOSTANAI. QazAqparat - Qostanaıda jańadan qurylǵan qurylysshylar qaýymdastyǵynyń birinshi jıyny ótti, dep habarlaıdy QazAqparat.
Búgin oblystyq «Atameken» kásipkerler palatasynda jergilikti taýar óndirýshilerdi qoldaý jóninde birinshi otyrys ótti. Jıynda qurylysshylar qaýymdastyǵy quryldy. Ony belgili qurylys salasynyń mamany, «BK-Stroı» kompanııasynyń dırektory Igor Kım basqaratyn boldy.
«Atameken» Ulttyq Kásipkerler palatasy kásipkerlerdiń máselelerin tıimdi ári jedel sheshedi. Búginde ár kásipker belgili bir qıyndyqtarǵa tap bolýy múmkin. Ol máselelerdi birigip sheshý barynsha ońaıǵa túsedi. Sol sebepti biz osyndaı qaýymdastyq quryp otyrmyz. Qaýymdastyq quramyna tek qurylysshylar ǵana emes, jobalaýshylar, tehnıkalyq qyzmetkerler de kiredi», - dedi Igor Kım.
Birinshi otyrysta-aq jańadan qurylǵan qaýymdastyqqa kirýge 29 kásiporyn nıet bildirdi. Birlestik qurylysshylardyń máselelerin zerttep, olardy kásipkerler palatasynyń kómegimen sheshetin bolady.
Sonymen qatar, qaýymdastyq qurylys salasynyń normatıvtik-tehnıkalyq bazasyn jetildirýge, qoljetimdi turǵyn úı naryǵyn qalyptastyrýǵa jáne turǵyn úı qurylysy qarqynyn attyrýǵa qatysady. Qurylys salasynda eńbek etetin ǵalymdar men mamandardy shoǵyrlandyrý, qurylys kásibiniń bedelin kóterý de basty mindetterdiń biri.
