Qostanaıda qurylys jumysyn uzaqqa sozǵan JShS dırektory úsh jylǵa sottaldy

QOSTANAI. QazAqparat – JShS dırektory Qostanaıda úleskerlerdiń aqshasyn tarta otyryp, kóppáterli turǵyn úılerdiń qurylysyn lıtsenzııasyz júrgizgen, dep habarlaıdy QazAqparat tilshisi.

Qostanaı qalasynyń №2 sotynda aldaý jáne senimdi teris paıdalaný jolymen múliktik zalal keltirgeni úshin JShS dırektory K.-ǵa qatysty qylmystyq is qaraldy.

Oblystyq sottyń baspasóz qyzmeti habarlaǵandaı, sottalýshy K. turǵyn úı qurylysyna lıtsenzııasy joq bola otyryp, úleskerlerdiń jergilikti atqarýshy organdar beretin aqshasyn tartý esebinen kelisilgen eskızdik jobasy men qurylysqa ruqsaty bolmastan, kóppáterli turǵyn úı qurylysyn júrgize bastaǵan.

«2012 jyldan bastap 2020 jylǵa deıin K. úı qurylysyna ınvestıtsııalaý sharttary jáne bolashaq satyp alýshylarmen páterlerdi satyp alý-satýdyń aldyn ala sharttaryn jasaǵan, osylaısha úı qurylysy aıaqtalmastan azamattardyń qarajaty tartylǵan. Sottalýshy K. sharttar boıynsha mindettemelerin oryndamaǵan jáne satyp alýshylarǵa 948 140 061 teńge somasyna iri zalal keltire otyryp, páterlerdi, garaj bokstaryn, turaq oryndaryn, kommertsııalyq úı-jaılardy bermegen», - dep habarlady oblystyq sot.

Sot jaryssózderi barysynda prokýror jábirlenýshilerdiń múlkin asa iri mólsherde aldaý jáne senimdi teris paıdalaný jolymen urlady degen aıyp taǵyp, 7 jylǵa bas bostandyǵynan aıyrý túrindegi jaza taǵaıyndaýdy surady. Sottalýshy kinásin moıyndamady. Sotqa deıingi is júrgizý barysynda ol 2021 jylǵy aqpandaǵy jaǵdaı boıynsha naryqtyq quny 1 551 166 681 teńgeni quraǵan aıaqtalmaǵan obektini berý arqyly zalaldyń ornyn toltyrdy.

Sot jaza taǵaıyndaǵan kezde is boıynsha jeńildetetin jáne aýyrlatatyn mán-jaılar anyqtalǵan joq.

«QK-tiń 195-babynyń 4-tarmaǵy 2-bóliginiń sanktsııasy múlki tárkilenip nemese onsyz, belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp nemese onsyz, bes jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrý túrindegi jazany kózdeıdi. Sot 3 jyl bas bostandyǵynan aıyrý, kásipkerlik qyzmetpen aınalysý quqyǵynan aıyra otyryp, sáýlet-qala qurylysy jáne qurylys qyzmeti salasyndaǵy ákimshilik-ókimdik fýnktsııalardy 2 jyl 6 aı merzimge, jazasyn ortasha qaýipsiz qylmystyq-atqarý júıesi mekemesinde óteı otyryp, jaza taǵaıyndady», - dep habarlady sotta.

Sottalýshy sot zalynda qamaýǵa alyndy. Úkim zańdy kúshine engen joq.