Qostanaıda qurylys qoımasy órtendi
NUR-SULTAN. QazAqparat – Qostanaıda «Mega Stroı» SÚ japsarlas ornalasqan qurylys qoımasynda órt shyqty, dep habarlaıdy QazAqparat QR ІІM TJK baspasóz qyzmetine silteme jasap.
15 qańtar kúni saǵat 07:03-te Qostanaı órt sóndirý qyzmetine Qarbyshev kóshesiniń boıyndaǵy «Mega Stroı» saýda úıine japsarlas salynǵan qurylys qoımasynda órt shyqqany týraly habar túsken.
Órt sóndirýshiler kelgen kezde qoımanyń syrtqy qabyrǵasynyń qaptamasy janyp jatqan. Órt 07:26-da aýyzdyqtalyp, 07:43-te tolyq sóndirildi.
Órt 80 sharshy metrdi sharpyǵan. Oqıǵadan eshkim zardap shekken joq. Órtti sóndirýge Qostanaı oblystyq TJD jeke quramynyń 30 adamy men 9 tehnıkasy jumyldyryldy.
