Qostanaıda quny 60 mln teńgege jýyq maınıng jabdyqtary saýdaǵa shyǵaryldy
QOSTANAI. KAZINFORM – Qostanaıda memlekettik múliktiń elektrondy saýda portalynda iri kólemdegi maınıng jabdyqtaryn satý týraly habarlandyrý jarııalandy, dep habarlaıdy Kazinform agenttiginiń tilshisi.
Satý týraly habarlama 2026 jylǵy 22 sáýirde e-qazyna saıtynda ornalastyrylǵan. Aýktsıon onlaın formatta ótedi, qazirgi ýaqytta ótinimder qabyldanyp jatyr.
Jarııalanǵan málimetke sáıkes, saýdaǵa 883 birlik jabdyq shyǵarylǵan. Sıpattamada tehnıkanyń buryn paıdalanylǵany, onyń jumysqa jaramdylyǵy tekserilmegeni jáne jasyryn aqaýlaryn qosa alǵanda túrli kemshilikter bolýy múmkin ekeni kórsetilgen.
Sondaı-aq jabdyqtardyń ishki tehnıkalyq jaǵdaıyna baǵalaý júrgizilmegen. Lottyń baǵalaý quny 58,4 mıllıon teńgeni quraıdy. Múlikke qatysty eshqandaı shekteý nemese tyıym salý sharalary joq.
Satýshy retinde Qarjy mınıstrligi Memlekettik múlik jáne jekeshelendirý komıtetiniń Qostanaı memlekettik múlik jáne jekeshelendirý departamenti kórsetilgen. Málimette múlikti berý jáne bekitý rásimine tek memlekettik mekeme nemese kásiporyn nysanynda tirkelgen zańdy tulǵalardyń, sonyń ishinde áleýmettik sala uıymdarynyń qatysa alatyny eskertilgen.
Saýda-sattyq 2026 jylǵy 8 mamyr kúni saǵat 10:00-de bastalady.
Eske salaıyq, buǵan deıin elektrondy saýdada Kárim Másimovtiń záýlim úıinen alynǵan samýraı qylyshy men bylǵary beldik satylǵan bolatyn.
