Qostanaıda qulandy atqan brakonerlerdi arnaıy top izdestirýde
QOSTANAI. QazAqparat – Qostanaı oblysynyń polıtseıleri «Qyzyl kitapqa» engen janýardy atqan brakonerlerdi izdep-tabý úshin arnaıy top qurdy. Bul týraly oblystyq Polıtsııa departamentinde ótken brıfıngte aıtyldy, dep habarlaıdy QazAqparat tilshisi.
Qostanaı oblysy PD Jergilikti polıtsııa qyzmeti basqarmasy Tabıǵatty qorǵaý bóliminiń bastyǵy Talǵat Ahmetovtiń aıtýynsha, qylmystyq is 3 qańtar kúni túsken.
«Qulannyń óltirilgeni týraly habar «Qazaqstannyń bıoalýantúrlilikti saqtaý assotsıatsııasy» memlekettik qoǵamdyq birlestiginen Arqalyq qalalyq polıtsııa bólimine tústi. Anyqtalǵandaı, 26 jeltoqsan kúni Qaıyńdy aýylynan 30 shaqyrym jerde qulannyń moınyna taǵylǵan GPS qarǵybaýy qozǵalyssyz qalǵan. Negizi, qarǵybaý spýtnık arqyly qadaǵalanady. Oqıǵa ornynda qulannyń basy men qarǵybaýy ǵana bolǵan. Assotsıatsııa ınspektorlary janýar bóligin sýretke túsirip, sol jerde qaldyryp ketken. Sýretti assotsıatsııanyń elordadaǵy keńsesine jibergen. Aýa raıynyń qolaısyzdyǵy saldarynan janýar bólikterin de, kólik izderin de qar basyp qalǵan. Bizdiń mamandar qarǵybaýdy ǵana taba aldy. Qylmysty ashý úshin arnaıy top quryldy. Qazir QR QK-niń 337-babymen is qozǵaldy. Zańsyz ańshylyq jasaǵandarǵa qatysty tergeý sharalary júrgizilýde», - dedi Talǵat Ahmetov.
Aıta keteıik, brakonerlerdiń qylmysy dáledense, 5 jyldan 10 jylǵa deıin bas bostandyqtarynan aıyrylýy múmkin.
Budan buryn habarlaǵanymyzdaı, Qostanaı oblysynda bir jyl buryn dalaǵa jiberilgen qulandardyń birin brakonerler atyp ketken.
