Qostanaıda quqyq qorǵaý qyzmetteriniń ortalyǵy ashyldy
Jańa ortalyqtyń ashylý saltanatyna oblys ákimi Arhımed Muhambetov pen QR Bas prokýrorynyń orynbasary Marat Ahmetjanov qatysty.
«Atqarýshy jáne quqyq qorǵaý organdary men halyqtyń arasyndaǵy ashyqtyqty qamtamasyz etý jańa nysannyń basty mindeti sanalady. Turǵyndardyń quqyq qorǵaý organdary qyzmetkerlerine degen senimi eshqashan tómendemeýi tıis. Osy baǵytta áli de talaı jumystar atqarylady», - dedi Marat Ahmetjanov.
Ortalyq qaladaǵy Tolstoı kóshesiniń boıynda ornalasqan. Munda azamattar bilikti mamandardan quqyq qorǵaý salasy boıynsha keńes ala alady. Kún saıyn eki prokýror kezekshilikte otyrady. Olar áleýmettik-ekonomıkalyq, ákimshilik óndiris salalary boıynsha jaýap bermek. 
Quqyq qorǵaý qyzmetteri ortalyǵynda memkirister departamenti, zań salasy mamandary, qorǵaýshylar, medıatorlar men psıhologtar jumys isteıdi. Arnaıy keste jasalyp, turǵyndar tizim boıynsha qabyldanady.
Oblys ákimi Arhımed Muhambetov jańa nysannyń qala ortalyǵynda ornalasqanyn aıtty. Onyń sózinshe, bul turǵyndardyń zań salasyndaǵy kóptegen máselelerdi sheshýge múmkindik beretin oryn bolady. Nysan qajetti materıaldyq-tehnıkalyq quraldarmen qamtamasyz etilgen.
