Qostanaıda kúdiktiniń páterinen 20 keliden astam marıhýana tárkilendi

QOSTANAI. QazAqparat – Qostanaı polıtseıleri jergilikti turǵynnyń páterinen 20 keliden astam marıhýana tárkiledi, dep habarlaıdy QazAqparat Polisia.kz saıtyna silteme jasap.

Oblys aýmaǵynda «Refleks» jedel-profılaktıkalyq is-sharasy júrgizilip jatyr. Maqsaty – esirtki quraldary men sıntetıkalyq psıhoaktıvti zattardyń zańsyz aınalymyna qarsy kúresti kúsheıtý.

«8 qarashada jedel izdestirý is-sharalary barysynda «Búrkit» arnaıy jasaqtarynyń qatysýymen bir mezgilde esirtki saýdasymen aınalysty degen kúdikpen Qostanaı qalasynyń bes turǵyny ustaldy. Ustalǵandardyń biriniń úıinen 45 polıetılenge oralǵan túıinshek, sondaı-aq erekshe ıisi bar, jasyl tústi zat salynǵan kólemdi qap tárkilendi. Tárkilengen esirtkiniń jalpy salmaǵy shamamen 20 keli boldy. Ári qaraı tekserý kezinde arnaıy jabdyqtalǵan eki jylyjaı bólmesi tabyldy. Onda qarasora ósimdikteri topyraq qosylǵan qumyralarda jaryqtandyrý shamdarynyń astynda ósirilgen», - deıdi oblystyq polıtsııa departamentiniń bastyǵy Erlan Omarbekov.

Keıin ustalǵandardyń biriniń balkonynan qarasora ósirýge arnalǵan plantatsııa anyqtaldy. Balkonnyń qabyrǵalary jaryqqa shaǵylysatyn matamen qaptalǵan, bólme jylytqyshtarmen, jaryqtandyrý qurylǵylarymen jáne jeldetkishpen jabdyqtalǵan, 9 qumyrada marıhýana ósirilgen.

«Osy fakti boıynsha Qazaqstan Respýblıkasy Qylmystyq kodeksiniń 297-babymen (Esirtki quraldaryn ótkizý) sotqa deıingi tergeý bastaldy. Kúdiktilerge qatysty qamaýǵa alý bultartpaý sharasy tańdaldy», - deıdi E. Omarbekov.

Bıyl óńirde 200 keliden astam túrli esirtki, onyń ishinde 555 gramnan astam geroın, 18 keli 450 gramm gashısh, 1 keliden astam sıntetıkalyq preparattar zańsyz aınalymnan alyndy.

Foto: polisia.kz