Qostanaıda QTJ laýazymdy tulǵalary dızel otyny men aqsha jymqyrǵany úshin sottaldy

ASTANA. KAZINFORM – Beıimbet Maılın aýdanynyń soty «QTJ – Júk tasymaly» JShS fılıalynyń Qostanaı paıdalaný lokomotıv deposynyń bastyǵy A. Mahmýtovqa, onyń orynbasary J. Syrmanovqa, jylý tehnıgi B.Serikulyna jáne «Qazaqstan-OEK» SÚ» JShS Tobyl stantsııasynyń otyn qoımasynyń bastyǵy K. Elıýsınovqa qatysty úkim jarııalady. Bul týraly Sybaılas jemqorlyqqa qarsy is-qımyl Agenttiginiń baspasóz qyzmeti málimdedi. 

«Olar QTJ dızel otynyn jáne temirjol kranyn jóndeýge bólingen qarajatty jalpy somasy 12 mln teńgege jymqyrǵany úshin kináli dep tanyldy. Mahmutov, Syrmanov, Elıýsınov 3 jyldan 4 jyl 6 aıǵa deıin bas bostandyǵynan aıyrýǵa, Serikuly 3 jylǵa bas bostandyǵynan shekteýge sottaldy», - delingen habarlamada.

Sonymen qatar, sottalǵandar ómir boıy memlekettik qyzmette qyzmet atqarý quqyǵynan aıyrylady.

Úkim zańdy kúshine engen joq.