Qostanaıda kitap oqý mádenıetin jańa deńgeıge kótergen aýqymdy joba nátıjesi jarııalandy
QOSTANAI. KAZINFORM – Qostanaı oblysynda 23 sáýir – Ulttyq kitap kúnine oraı «Kitap oqıtyn ult» jobasynyń qorytyndysy shyǵarylyp, jeńimpazdar saltanatty túrde marapattaldy. Óńirde júzege asqan aýqymdy bastama 55 myń qatysýshyny qamtyp, kitap oqý mádenıetin keńinen nasıhattaǵan iri qoǵamdyq qozǵalysqa aınaldy.
Qostanaı – aǵartýshylyq pen bilimniń tamyry tereńge ketken qasıetti ólke. Bul – qazaq dalasynda alǵash mektep ashyp, bilim shamyn jaqqan Ybyraı Altynsarın men ult rýhanııatynyń irgesin qalaǵan Ahmet Baıtursynulynyń izi qalǵan óńir. Osyndaı tarıhı sabaqtastyq aıasynda Memleket basshysy Qasym-Jomart Toqaevtyń kitap oqıtyn ult qalyptastyrý jónindegi bastamasy Qostanaı oblysynda júıeli túrde júzege asyp keledi.
Saltanatty rásimde sóz sóılegen oblys ákimi Qumar Іrgebaıuly Aqsaqalov kitap oqýdyń qoǵam damýy úshin mańyzyn atap ótti:
– Kitap oqıtyn adam – árqashan bilimimen ozyq, oıy ushqyr jáne kez kelgen ortada básekege qabiletti bolady. Bizdiń basty maqsatymyz — jastardy tek bilimdi ǵana emes, sonymen birge tereń oılaıtyn, rýhanı baı tulǵa retinde tárbıeleý. Dál osy joba — bolashaq zııatker ultty qalyptastyrý jolyndaǵy mańyzdy qadam, - dedi óńir basshysy.
Іs-sharaǵa arnaıy qatysqan Memlekettik syılyqtyń laýreaty, Qazaqstannyń eńbek sińirgen qaıratkeri, TÚRKSOI Jazýshylar odaǵynyń tóraǵasy Ulyqbek Esdáýlet jobanyń rýhanı mánine toqtalyp, óńirdegi oqyrman mádenıetiniń damýyna joǵary baǵa berdi.
Joba Qostanaı oblysynyń 16 aýdany men 4 qalasyn qamtyp, 300-den astam bilim berý uıymyn biriktirdi.
Jalpy 1 200-den astam ıntellektýaldyq is-shara (kvızder, debattar, kitap talqylaýlar) ótkizildi. Nátıjesinde kitaphanalarǵa kelýshiler sany men jańa oqyrmandar qatary aıtarlyqtaı artty. Bul kórsetkishter óńirde kitap oqý mádenıetiniń turaqty qoǵamdyq qundylyqqa aınalyp kele jatqanyn kórsetedi.
Jobanyń nátıjeliligin qamtamasyz etken basty faktorlardyń biri – pedagogıkalyq qaýymdastyqtyń belsendi qatysýy.
Jobaǵa 11 myńnan astam pedagog qatysyp, muǵalimder kitaphanalarmen tyǵyz baılanysta jumys isteı otyryp, oqýshylardy júıeli túrde kitap oqýǵa baýlydy jáne oqý protsesin turaqty súıemeldedi. Nátıjesinde balalardyń jobaǵa qatysý deńgeıi aıtarlyqtaı artty. Bul tájirıbe «mektep – pedagog – kitaphana» ózara is-qımylynyń tıimdi modelin qalyptastyrdy.
Atalǵan jobaǵa 400-den astam memlekettik qyzmetshi qatysyp, ártúrli memlekettik qurylymdardyń ókilderi keńinen qamtyldy. Qatysýshylar memlekettik qyzmettegi joǵary jumys qarqynyna qaramastan kitap oqýǵa turaqty qyzyǵýshylyq tanytyp, jobanyń oı-óristi keńeıtýge jáne sheshim qabyldaý sapasyn arttyrýǵa yqpal etetinin atap ótti. Nátıjesinde kitap oqý mádenıetiniń memlekettik qyzmet júıesinde de ornyǵa bastaǵany baıqaldy.
Joba nátıjesinde qatysýshylardyń oqý belsendiligi birneshe esege artty.
Saltanatty keshte úzdik qatysýshylar dıplomdarmen jáne 1 mıllıon, 600 myń, 400 myń teńge kólemindegi sertıfıkattarmen marapattaldy. Jalpy júlde qory – 40 mln teńgeni qurady.
Aýqymdy jobanyń júzege asýyna «AMANAT» partııasy men Qostanaı óńirindegi iri agroónerkásiptik qurylym — «Olja Agro» JShS-niń belsendi qoldaýy serpin berdi. Bul seriktestik memleket pen bıznestiń aımaqtaǵy adamı kapıtaldy damytý isindegi ortaq jaýapkershiligin aıqyn ańǵartady.
«Kitap oqıtyn ult» – bul joba ǵana emes. Bul – bilim men parasatty qundylyqqa aınaldyratyn ulttyq qozǵalys.
Qostanaı oblysynyń tájirıbesi Kitap oqıtyn ult qalyptastyrý ıdeıasynyń naqty júzege asatynyn dáleldep otyr.
Aımaqta «Kitap oqıtyn ult» jobasy Amanat partııasy men Olja Agro kompanııasynyń qoldaýymen júzege asyryldy.
