Qostanaıda kranshynyń ólimine jumys berýshi kináli dep tanyldy

ASTANA. KAZINFORM – Sotta «NurCom Building» JShS dırektoryna qatysty qylmystyq is qaraldy. Seriktestik basshysyna «qurylys jumystary kezinde qaýipsizdik erejelerin buzyp, abaısyzda adam ólimine ákep soqtyrdy» degen aıyp taǵyldy.

Qaıǵyly oqıǵa 2023 jyldyń 30 qarashasynda saǵat 13:00 shamasynda bolǵan.  

Qurylys-montajdaý jumystaryn júrgizý barysynda kran mashınısi júk kótergish kranmen beton plıtalaryn kótere bastaǵan. Ókinishke qaraı, arqannyń uzyndyǵy durys esepke alynbaı, kran qulap, kabınada otyrǵan 49 jastaǵy júrgizýshi qaıtys bolǵan edi.

Keıin júk kótergish mehanızmderdi paıdalaný kezinde ónerkásiptik qaýipsizdik erejelerin buzýǵa jol berilgeni anyqtalǵan bolatyn. Bolǵan oqıǵaǵa tolyǵymen jumys berýshi kináli ekeni dáleldenip, ol óz kinásin tolyq moıyndap, keltirilgen shyǵyndy ótep berdi.

Sot talqylaýy barysynda memlekettik aıyptaýshy sottalýshyny Qylmystyq kodekstiń 63-babyn (shartty túrde sottaý) qoldana otyryp, 3 jylǵa shartty túrde bas bostandyǵynan aıyrýdy surady.

Nátıjesinde sot Qylmystyq kodekstiń 44-babyna (Bas bostandyǵyn shekteý) sáıkes, probatsııalyq baqylaý ornatý arqyly 2 jylǵa bas bostandyǵyn shekteý jazasyn taǵaıyndady.