Qostanaıda kóterme saýdagerler jalǵan baǵa kórsetilgen júkqujattar úshin jazalandy
ASTANA. KAZINFORM – Qostanaıda eki saýda nysanynda áleýmettik mańyzy bar azyq-túlik taýarlaryna belgilengen shekti saýda ústemesiniń saqtalýyna tekserý júrgizildi, dep habarlaıdy Kazinform tilshisi.
Kásipkerler tekseristen sátti ótkenimen, olar usynǵan qujattar Saýda jáne tutynýshylardyń quqyqtaryn qorǵaý departamenti mamandarynyń kúmánin týǵyzǵan. Keıingi tekserý barysynda júkqujattardaǵy málimetterdiń shyndyqqa sáıkes kelmeıtini anyqtaldy.
Bul týraly Saýda jáne tutynýshylardyń quqyqtaryn qorǵaý departamentinde málimdedi. Alǵashqy tekserý kezinde dúkenderdiń jumysynan zańbuzýshylyq anyqtalmaǵan. Kásipkerler áleýmettik mańyzy bar azyq-túlik taýarlaryna saýda ústemesi belgilengen 15 paıyzdan aspaıtynyn rastaıtyn qujattardy usynǵan.
Soǵan qaramastan, departament qyzmetkerleri júkqujattardaǵy málimetterdiń shynaıylyǵyna kúmán keltirgen. Osyǵan baılanysty vedomstvo usynylǵan aqparatty tekserý úshin kóterme saýda jetkizýshilerine qarsy tekserý júrgizýdi uıǵardy.
Nátıjesinde kóterme saýdagerler seriktes dúkenderdiń ótinishi boıynsha olarǵa qajetti baǵa kórsetilgen júkqujattardy rásimdegeni anyqtaldy. Osylaısha, bastapqyda zań talaptarynyń saqtalǵanyn rastaǵan qujattardyń shyndyqqa sáıkes kelmeıtini belgili boldy.
Qarsy tekserýlerdiń qorytyndysy boıynsha ákimshilik jaýapkershilikke bólshek saýda oryndarynyń ıeleri emes, osyndaı júkqujattardy rásimdegen kóterme jetkizýshiler tartyldy.
Saýda jáne tutynýshylardyń quqyqtaryn qorǵaý departamenti resmı túrde rásimdelgen qujattardyń bolýy olardyń shynaıylyǵyn keıinnen tekserýge kedergi keltirmeıtinin eskertti. Júkqujattarǵa jalǵan málimet engizgeni úshin zańnamada jaýapkershilik qarastyrylǵan.
Eske sala keteıik, buǵan deıin BQO-da saýda ústemesin asyra belgilegen 9 kásiporyn jaýapqa tartylǵan edi.
