Qostanaıda qos kólik soqtyǵysyp, eki adam kóz jumdy

QOSTANAI. QazAqparat – Rýdnyı tasjolynda eki kólik soqtyǵysyp, eki adam kóz jumdy, dep habarlaıdy QazAqparat tilshisi oblystyq polıtsııa departamenti baspasóz qyzmetine silteme jasap.

Oqıǵa «Rýdnyı-Qashar» avtojolynda bolǵan. 61 jastaǵy «MAN» avtokóliginiń júrgizýshisi jol jıeginen shyqqan kezde manevrdiń qaýipsizdigine kóz jetkizbeı, «Ravon Nexia» avtokóligimen soqtyǵysqan. Jeńil kóliktiń rýlinde 34 jastaǵy er adam otyrǵan. «Jol apaty saldarynan «Ravon»-nyń 30 jastaǵy jolaýshysy alǵan jaraqatynan oqıǵa ornynda, 23 jastaǵy jigit aýrýhananyń jansaqtaý bóliminde kóz jumdy. Taǵy eki jolaýshy Rýdnyı qalasynyń aýrýhanasyna jatqyzyldy. Jol-kólik oqıǵasy Qylmystyq kodekstiń 345-baby 4-bóligi boıynsha tirkeldi. Qostanaı aýdany polıtsııa bóliminiń qyzmetkerleri sotqa deıingi tergep-tekserý sharalaryn bastady», - deıdi polıtsııa departamentiniń baspasóz hatshysy Irına Bejenar.

Polıtsııa departamenti avtokólik ıelerin jolda saq bolýǵa, jyldamdyq rejımin saqtaýǵa jáne qolaısyz aýa raıy jaǵdaıynda jol erejelerin buzbaýǵa shaqyrdy.