Qostanaıda kópten beri esirtki saýdalap júrgen áıel ustaldy
QOSTANAI. QazAqparat - Qostanaı qalasynda esirtki taratýmen aınalysqan 49 jastaǵy áıel ustaldy, dep habarlaıdy QazAqparat tilshisi oblystyq ІІD baspasóz qyzmetine silteme jasap.
Qala turǵyny birneshe jyl boıy esirtki satýmen aınalysyp kelgen. Ol buǵan deıin de «Esirtki zattaryn zańsyz saqtaý» faktisi boıynsha jazaǵa tartylyp, 10 jylǵa bas bostandyǵynan aıyrylǵan.
Jedel aldyn-alý sharasy barysynda polıtsııa qyzmetkerleri kúdik týdyrǵan egde jastaǵy azamatshany teksergen. Nátıjesinde onyń syrt kıiminiń qaltasynan polıetılenmen qaptalǵan túıinshek tabyldy.
«Qylmyskerdi Rabochaıa kóshesiniń boıynda ustadyq. Onyń qaltasynda 37 gramm geroın bolǵan. Qazir ol ýaqytsha ustaý ızolıatoryna qamaldy. QR QK 297 baby, 3-bóligi boıynsha sotqa deıingi tergeý amaldary bastaldy», - dedi ІІD uıymdasqan qylmyspen kúres basqarmasynyń qyzmetkeri Іlııas Ahmetov.
Jalpy jedel aldyn alý sharalary aıasynda jyl basynan beri oblys kóleminde 184 keli esirtki zattary tárkilenip, 220-dan asa qylmystyq is qozǵalǵan.
